Europap illoqarfiini akunnittarfimmi unnuineq seqernup pulannginnerani akitsortoq
Europami illoqarfissuarni arlalinni seqernup pulaneranik takornarianit tusindilikkuutaanit pingasunngornermi isiginnaariarneqarmat akunnittarfinni unnuiffissat akitsoraluttuinnarput.
Taama allappoq tuluit tusagassiorfiat The Guardian.
Islandip illoqarfiisa pingaarnersaanni Reykjavikimi akunnittarfinni unnuisitsinermut akit akitsornerpaaffiisa ilaat nalaanneqartoq, tusagassiorfik allappoq.
Illoqarfik taanna seqernup pingasunngorpat pulaneranik isiginnaariarfiusinnaasut arlaqanngitsut ilagaat.
Islandip illoqarfiisa pingaarnersaanni takornariat akunnittarfimmi inimut pingasunngornermi agguaqatigiissillugu 793 dollarit – 5.100 koruunit missaanniittut – akiliutigissavaat, siorna ullormut tassunga akigitinneqartumut sanilliullugu 98 procentimik akisunerulluni.
The Guardian, angalanermik akunnittarfinnillu paasissutissiinermik suliaqartumit Lighthouse Intelligencemit paasissutissat tunngavigalugit, taama allappoq.
Spania takornariarpassuarnik tikeraartoqarnissaminut aamma piareersarpoq, Spania seqernup pulaneranik Europap nunavittaani isiginnaarfiusinnaasut pitsaanerpaat ilagimmassuk.
Spaniami aningaasaqarnermut ministeriaqarfiup seqernup pulaneranik isiginnaariat nunanit allaneersut 460.000-it tikinnissaat naatsorsuutigineqartoq ataasinngornermi nalunaarutigaa.
Ulikkaaveqqasut
Spaniap avannaani illoqarfimmi A Coruñami akunnittarfimmut inimut akigititaq siornarnit 135 procentimik akisuneruvoq, agguaqatigiissillugulu maanna 451 dollariulluni - 2900 koruunit.
Mallorcami akit, seqernup pulanera seqernup tarrilernerani takussaassangatinneqartumi, akit 24 procentinik akitsorsimapput.
Santiago de Compostelami Bilbaomilu akunnittarfinni akit 34 procentimik 67 procentimillu akitsorsimapput, The Guardian allappoq.
Illoqarfinni nunaqarfinnilu unnuisarfiit tamavimmik qaammatini arlalinni inniminnerneqareersimapput.
Kalaallit Nunaanni seqernup pulanera aamma takuneqarsinnaajumaarpoq, seqernulli pulanera piffissani assigiinngitsuni annertussusaa assigiinngiiaassaaq.
Timeanddate.com-ip nutaarsiassiinera naapertorlugu, seqernup pulanera Ittoqqortoormiini tupinnarnerpaassaaq, seqerngup nalunaaqutaq 16.37 pulalluinnaaqqiffiani, seqineq qaammammit 99,67 procentimik asserneqassammat.
MarineTraffic-imit paasissutissat naapertorlugit umiarsuit 35-nit amerlanerusut maannakkut Ittoqqortoormiiniipput.
Seqernup pulanera Danmarkimi ilaannakortumik aamma pingasunngornermi takuneqarsinnaassaaq. Seqernup 80 procentia sinnerlugu qaammammit asserneqarnera tassani takuneqarsinnaassaaq.
Qaammat seqernup saavanut pigaangat nunarsuaq tarranilluni taama pisoqartarpoq.
RITZAU
