Europami sumiiffinni arlalinni upernaaq kiassiorfiulluni rekordiliiffiusoq
Frankrigimi upernaaq manna aatsaat taama kiatsigaaq.
Franskit silasiorfiat Meteo France, nunani allani arlalinni aamma aatsaat taama kiassiortigisoqareersorlu, taama ilisimatitsivoq.
Frankrigimi marsimiit maajip tungaanut agguaqatigiissillugu 13,8 gradinik kiappoq. Nalinginnaasumit 1,7 gradit missaannik kianneruvoq.
- Upernaaq manna, uuttortaasarneq 1900-mi aallartimmalli, kianneruvoq, Frankrigimi silasiortut nalunaarput.
Upernaap qaammatai pingasut tamarmik agguaqatigiissillugu kiassuserisartakkamit kiassiorfiunerupput.
Kiassuarli "siornatigut nalaanneqarsimanngitsoq“ maajip naalernerani pimmat, kiassutsit aasamisulli kiassiorfiutigaat.
- Nunarput ukiup taamaalinerani taama kiatsiginikuunngisaannarpoq - rekordiliat arlallit qaammammi tassani qaangerneqarput, silasiorfik allappoq.
Taamaattumik Frankrigimi, nunanilu arlalinni allani aamma, sila ulluni makkunani rekordiliivoq.
El Niñop nalaanneqarnissaa ilimanaateqartorujussuusoq
Norgemi aamma upernaaq aatsaat taama kiassiorfiutigisoq nalunaarsorneqarpoq.
Englandimi Walesimilu aamma taamaappoq. Tuluit Nunaalli tamakkiisumik qiviaraanni, maannamut upernaami kiassiornerpaaffiit pingajoraat.
Sumiiffinnilu arlalinni qaammatit kingulliit kiassiorfioreersullu, silap qaammatini tulliuttuni allanarsinnaavoq.
Silami pisartup El Niñop juunip aggustillu akornanni pinissaa 80 procentinik ilimanaateqarpoq, taamaammallu sila allanarluinnaratarsinnaavoq.
World Meteorological Organization (WMO), FN-ip silasiornermik suliaqartui nutaarsiassaqartitsivik AFP-ip nutaarsiassiinera naapertorlugu taama nalunaaruteqarput.
El Niñop Manerassuup kangiani Ækvatorip nalaani immamik kissarnerulersitsisarnini ilisarnaatigaa. Immap kissarnerunera kiannerulerneranik nunallu immikkoortuisa ilaanni siallernerulerneranik allanilu sialussakinnerulerneranik kinguneqarsinnaavoq.
Assersuutigalugu Australiami panernersuaqarsinnaavoq, USA-llu kujataatungaani nillernerulerlunilu siallernerulersinnaavoq.
El Niñop nalaani nunarsuup ilarujussuani sila allanngortarpoq - nunarsuarlu kiannerulerallarsinnaavoq.
WMO-p paasissutissiinera naapertorlugu, El Niño qaammatit qulingiluaniit aqqaneq-marluk tungaannut sivisussuseqartarpoq.
/ritzau/AFP
