Nunatsinni ilinniartut Tuluit Nunaanni ilisimatusarnermi ilinniarfinni masteritut ilinniarsinnaalerput

Ilinniartitaanermut, Naalakkersuisoq Nivi Olsen (D) aamma Danmarkimi Tuluit Nunaata aallartitaa Victoria Elizabeth Billing, suleqatigiinnissamik isumaqatigiissummik nutaamik maajip 20-anni atsioqatigiipput.

Kalaallit Ilisimatusarfimmi bacheloritut naammassisimasut, Chevening Scholarship aqqutigalugu, Tuluit Nunaanni masteritut ukioq ataaseq ilinniarsinnaalernissaat periarfissaalissaaq.

Aningaasanik tapiisarfik Chevening Scholarship aqqutigalugu qinnuteqarnermi ilinniarnerup akia, qaammammut aningaasartuutit kiisalu Tuluit Nunaanniit uterlugulu angalanerit tamakkiisumik Tuluit Nunaata nunanut allanut naalakkersuisoqarfiata akilissavai.

Tamannalu nunatsinni ilinniartuniit atorluarneqarnissaa, Ilinniartitaanermut naalakkersuisup Nivi Olsenip neriuutigaa.

-Ammaanneqarput Tuluit Nunaanni ilisimatusarfinni pitsaasuni ingerlariaqqissallutik, akiliunneqarlutik aamma uani periarfissinneqarput ilaqutaqaraanni ilaquttat nassarneqarsinnaallutik Tuluit Nunaanni ilinniakkap tigunerani.

Chevening Scholarshipimut aningaasanik qinnuteqarfissaq ukioq manna aggustimi  periarfissaalissaaq. 

Alloriarneq siulleq

Aningaasanik tapiisarfimmut qinnuteqarnermi ilisimatusarfimmi bacheloritut naammassisimanissaq suliffimmilu sivikinnerpaamik ukiuni marlunni misilittagaqarnissaq piumasaqaataavoq.

Tuluit Nunaanni masteritut ilinnialernissamut ilinniarfigineqarsinnaasut assigiinngillat, ilaatigut; inatsisilerineq, tusagassiorneq aamma oqaasilerineq.

Tamannalu Naalakkersuisup tulluusimaarutigaa.

-Nunarsuarmioqataanerput aammalu ilinniarsimassutsikkut qaffasissuseq annertoorujussuaq nassarlugu utissasut qularnanngilaq. Taamaammat tunissut aammalu inissinneq ilinniarnerup silarsuaani angisoorujussuaq ammaanneqarpoq.

Nunatta Tuluit Nunaatalu isumaqatigiinnerat suleqatigiinnerulernissamut alloriarneq siulliusoq aamma oqaatigaa:

-Meeqqat atuarfiini ilinniartitsisut tuluit oqaasiinik ilinniartitsinissaminnik nukkassarniarpagut, taakkulu aamma suleqatigiissutissanik annertuunik eqqarsaatersuuteqarluta, Nivi Olsen oqarpoq.