Europami siunnersuisooqatigiit isornartorsiuinerat pissuteqarluarpoq
Europami siunnersuisooqatigiit inunnik naalliutsitsineq pillugu ataatsimiititaliaata nalunaarusiaani danskit naalakkersuisui isornartorsiorneqartut iluarsiivigineqarnissaannut qaammatit arfinillit iluanni pilersaarusioqqullugit peqquneqarput. Suliarlu taanna Sara Olsvigip malittarissallugu qilanaarivaa. Susassaqarfimmili suliniuteqarnini ingerlatiinnarniarpaa, sammisarlu pillugu tusarniaasoqarnissaa Folketingip Kalaallit Nunaannut ataatsimiititaliaanut siunnersuutiginiarlugu.
-Ilaatigut arnat 18-illu inorlugit ukiullit inissiisarfinni atugaat nalunaarusiami allaaserineqarput, aammalu sammisassaqartitsinermut katsorsaanermullu periarfissaqannginnera iserfigineqarluni. Susassaqarfiit taakku tamaasa amigaateqarfiusutut uparuarnikuuakka. Susassaqarfiilli ilaat nalunaarusiami saammineqanngillat, soorlu assersuutigalugu inissiisarfinni sulisunut atugassarititaasut, tamatumali suliniuteqarfiginera ingerlatiinnassavarput, Sara Olsvig oqarpoq.
Kalaallit Nunaanni pinerluttunik isumaginnittoqarfimmi pissutsit Danmarkimi pissutsinut naapertuutikannilersinnissaat anguniagaavoq. Anguniagaq taanna maannakkorpiaq piviusorsiortuunngitsutut isikkoqarpoq, Sara Olsvigilli tamatumunnga tunngatillugu isumalluarpoq.
Inatsisinik atortitsinermut ministeri apersorneqarnermini oqaatigaa Kalaallit Nunaanni pinerluttunik isumaginnittoqarfimmut 14 millioner koruuninik ilassutitut aningaasaliisoqarsimasoq, aningaasalli taakku Kangerlussuarmi pinerluteqarsimasunut inissiisarfiugallartussamut immikkut aningaasaliissutaapput, taamaattumillu inissiisarfiit sinnerinut taakkunanilu pissutsinut attuumassuteqaratik, Sara Olsvig isumaqarpoq.
