EU-p isumaliuutississutaa Samuelsenip qularnartoqartilaaraa
Ministeri KNR-imut taama allappoq.
- Pitsaasunik imaqarpoq, nalunaarusiarli issittormiunut ineriartortitsinissamillu pisariaqartitsinermut naapertuutinngitsunik aamma oqaasertaqarsoraarput, Anders Samuelsen taama allappoq.
Isumaliuutissiissummi ilaatigut allassimavoq EU-p Issittumi pigisaani uuliasiortoqarnissaanut inerteqquteqarluinnarnissap sulissutigineqarnissaa Europa-Parlamentip kissaatigigaa. Tassalu ilaatigut Norgep imartaani.
Taamatullu oqaasertaliisoqarnera Nunatta Bruxellesimi Sinniisoqarfiata danskit EU-parlamentimi ilaasortaatitaat suleqatigalugit unitsinniarsimagaluarpaat.
Parlamentip isumaliuutissiissutaa pittutuinngilaq, EU-lli Issittoq pillugu periusissaanut siorna saqqummiunneqartumut tapiliussaalluni.
Tamannalu danskit nunanut allanut ministeriata Anders Samuelsenip toqqissisimanartippaa.
- Issittoq katersugaasiviunani inunnik najugaqarfigineqarpoq, taakkulu nunarsuarmi sumiiffinni allanisulli aningaasarsiornikkut attanneqarsinnaasumik ineriartornissaminnut pisinnaatitaaffeqarput. Isumalu tunngaviusoq taanna Kommisionimit, nunanut allanut politikkikkut ataatsimoorussamik suleqatigiiffimmit nunanillu ilaasortaasunit allanit isumaqataaffigineqarpoq, ministeri KNR-imut taama allappoq.