EU-p Issittumi uuliasiornissap inerteqqutiginissaa taperseraa
Issittumi uuliasiortoqarnissaata inerteqqutigineqarnissaanut siunnersuutit arlallit Europami inatsisartut 483-it sisamanngornermi akueraat 100-ullu akerliullutik.
EU-p EØS-illu imartaani sikoqartumi uuliasiornissap inerteqqutigineqarnissaa pineqarpoq, tassanilu Norge Islandilu aamma ilaapput. Issittumi ineriartortitsisoqarnissaanut europami inatsisartut isumaliutissiissutaannit tamanna aallaaveqarpoq.
Dansk Folkepartii sinnerlugu inatsisartunut ilaasortap, Jørn Dohrmannip taama nalunaaqutsiineq alianartorujussuusoraa.
- EU-p naalagaaffinnut namminiilivittussanut akuliunnera kanngunartuusoraara. Taamaammat pilersitsiniarnermut nalunaarusiamut aalajangiinikut pakatsissutigalugit oqaatigisinnaavara, KNR-imut oqarpoq.
DF: Kalerriuteqarnerlunneq
Isumaliutissiissut EU-kommissionip pisortatigoortumik Issittumut ukioq kingulleq iliuusissaliussaanut tapertaasussaq pineqarpoq. Inatsisartulli isumaliutissiissutaat EU-kommissionimit EU-miluunniit nunanit atorneqarnissaa pituttorsimanngilaq.
Taamaattorli aalajangiineq Dohrmannip alianartuusoraa. EU-mimi qinikkat amerlanerussuteqartut silap pissusianut anguniakkanik, Parisimi isumaqatigiissutigineqartunik angusaqarniaannarlutik Issittoq eqqissisimatinneqartussatut isiginerannik takutitsipput.
- EU-mi inatsisartut amerlanerussuteqartut nunap allanngutsaaliorneqarnissaanik isumaqarput. Nunamilu tassani ukiorpassuarni najugaqartut inuunissaminnut nunamilu isumalluutinik atuinissamut akuerineqannginnerannik kalerriuteqarneq ersareqaaq, Dohrmann oqarpoq.
Aammattaaq isumaliutissiissutip Issittumi nunap inoqqaavisa pisinnaatitaaffiinik taakkulu nunami isumalluutinik atuisinnaanerannut tapersiinera imminut assortortoq DF-imit politikeri isumaqarpoq.
AAMMA ATUARUK Arktis-rapport kan spænde ben for EU-plads i Arktisk Råd
Dansk socialdemokraatineersoq inerteqquteqarnermut illersuisuusoq
Finlandimiut Vestreforbundiat, italiamiullu qinigassanngortitaat attaviitsut, partiillu avatangiisit mianerineqarnissaannik anguniagallit socialdemokratillu Issittumi uulisiortoqarsinnaanissaanut inerteqqut tapersersorpaat.
Christel Schaldemosep, danskit socialdemokraatianeersup isumaliutissiissut EU-p EØS-illu killeqarfiini inerteqquteqarnissaq taperserpaa.
- Kalaallit Nunaanni uuliasiorniarnerup inerteqqutigineqarniarnera allakkami allassimasoq peerparput. Tamanna pingaaruteqartorujussuuvoq. EU-mmi EU-mut aningaasaqarnikkut toqqaannartumik attuumassuteqanngitsut maleruagassalersorsinnaanngilai, KNR-imut oqarpoq.
