KNAPK aamma GE: EU-mik isumaqatigiissut pitsaavoq
Nunatsinni aalisartut aalisagartassinneruneqarnissaat, KNAPK-p neriuutigaa.
- KNAPK-p namminnerlu suliffiuteqartut kattuffiat, avataasiortunit ilaasortaaffigineqartoq, Namminersorlutik Oqartussanut qangalili oqariartortaraluarput akilersinnaanerusoq kalaallit aalisariutaasa namminneq aalisarpatigit. Kisianni EU annertunerusumik piumasaqaraluartoq, aqutsilluarnikkut iluatsinngimmat, taannartaa nersualaarparput, KNAPK-mi pisortaq Petrus Biilmann oqarpoq.
AAMMA ATUARUK EU-mut aalisagartassiissutit ikinnerussapput
Aalisartut europamiut Nunatta imartaani ikinnerusunik raajartassinneqarlutillu suluppaagartassinneqarput, amerlanerusunilli saarullittassineqarlutik.
KNAPK-llu tamanna nuannaarutigigaluaraa, GE eqqissisimaneruvoq.
- Amerlanerusunik pisassinneqarnissarput ilimananngilaq, aalisakkanukua ikinnerummata pisassiissutit ikinnerutippaat, Sulisitsisut Peqatigiiffianni, GE-mi, siulittaasoq Henrik Leth oqarpoq.
Europamiut aalisartut ikinnerusunik aalisagartassinneqarput, taamaammallu EU-p Nunatta karsianut aappaagumut akiliutai 17 millionit koruuninik ikinnerussapput.
EU-mulli pisassiissutigineqartut Nunatsinni aalisartut namminneq aalisartariaqaraluaraat, GE-mi siulittaasoq KNAPK-tulli isumaqarpoq.
Aalisartuvummi Nunatta karsiinut ilaqutariinnullu amerlanerusunik aningaasalersuisartut, taanna isumaqarpoq.
- Kalaallinik aalisartunit aalisarneqarsinnaasuuppata, Kalaallit Nunaat namminersortumillu aningaasarsiortut allat aningaasanik amerlanernik isertitaqartassagaluarput, Henrik Leth oqarpoq.
Isumaqatigiissutip kingunerisaanik Nunarput EU-mi aalisartut aalisagartassiineermigut 95 millionit koruuninik pissarsissaaq. EU-p Nunatta missingersuusiortarneranut tapiissutai allanngoratik 22 millionit koruuniussapput.