Erik Jensen politiinut Naleqqami politikerimit unnerluutigineqartoq

Naqqiut: Erik Jensen (Siumut) KNR-ip saaffiginnissutaanut akissuteqarsimanngitsoq siusinnerusukkut oqaatigaarput. Erik Jensenip allaatigisamik matuminnga KNR-ip aaqqissuisoqarfiata saqqummiussinnginnerani akissuteqarsinnaasimannginnera Inatsisartut ataatsimiittarfianni ulappunnerannik peqquteqartoq erseqqissaatigissavarput. Paatsoornerput KNR-imit ajuusaarutigaarput.

Naleqqami politikerip, Jens Napaattuup aamma aningaasaqarnermut akileraartarnermullu naalakkersuisup Erik Jensenip akornanni pisoq pisoqarfioqqippoq.

Siumup Naleqqami politikeri Jens Napaattooq aalisarnermut piniarnermullu ataatsimiititaliamit paasissutissanik isertuussassanik Polar Seafoodip pisortaanut Bent Sallingimut ingerlatitseqqiisimasutut Inatsisartuni siulittaasumut unnerluutigigaa.

Jens Napaattuup Erik Jensen maanna politiinut unnerluutigaa.

Tamanna Jens Napaattuup Bent Sallingillu nunatsinni aalisarnermut inatsisip nutaap suliarineqarneranut atatillugu oqaloqatigiinneranik naalakkersuisup oqaloqatigiinnermik immiussisimaneranik pissuteqarpoq.

Tamanna Jens Napaattuup eqqartuussissuserisuanit allagaatimi KNR-ip takunniffigisaani atuarneqarsinnaavoq.

Eqqartuussisussaanngilagut

Naleqqami politikeri unnerluussineq pillugu ima oqarpoq:

- Isumaqarama eqqunngitsumik toqqaannartumik uanga pineqarlunga misigisimagama taama aalajangerpunga.

- Uagut politikerit eqqartuussisussaanngilagut inunnik pillaasussaanngilagut, taanna ataasiarani nammineq eqqartuussisutut inissittuartarnerput ingasalerami. Ingammik aamma uannut, aatsaat taamaaliortoqalinngimmat. Naammagalugu killiliisariaqarneq killiffiusimammat, taamatut iliortariaqarlunga misigisimallunga tunniussaqarpunga, Jens Napãtôq KNR-imut oqarpoq.

Politiinut unnerluummi ilaatigut ima allassimavoq:

‘Erik Jensenip unnerluussisoq (Jens Napãtôq aqq.) nammineq angerlarsimaffimmi aneerasaartarfianiittoq isertorluni immiuppaa.’

‘Erik Jensenip taamaalilluni unnerluussisup (Jens Napãtôq aaqq.) aamma Polar Seafoodimi pisortap oqaloqatigiinneranni pisinnaatitaanani oqaloqatigiinnerup imarisaanik ilisimanniffigilerpaa. Erik oqaloqatigiinnermi peqataanngilaq, immiussinermigulli ilisimannilerluni.’

Politikki salliuteqqaaraa

Pisoq tamarmi maajip qiteqqunnerani – aalisarnermut inatsisip nutaap maajip 16-ini akuerineqarnissaanut ullut marluinnanngortut aallartippoq. Immiussineq taamaattumik aalisarnermut inatsisissap pingajussaaneerneqarnissaata pinngitsialaarnerani inatsisip suliarineqarnerani piffissami pingaartumi pivoq.

Jens Napaattuup piffissaq manna sioqqullugu politiinut unnerluutiginninnginnerminut pissutissaqarluarnerarpaa.

- Siusinnerusukkut tunniussimasinnaagaluarparput kisianni politikkimi qamani suliassagut inuiaqatigiit sinnerlugit suliassat naammasseqqaarnissaat utaqqinissaat piffissatut inissisimaqqaarfiginissaa uagut isigisimavarput. Aamma inuttaa (Erik Jensen aaqq.) nammineq uannut siorasaarinikuuvoq unnerluunniarlunga, taanna aamma utaqqimisaarsimagaluarakku aamma peqqutit ilagivaat.

Suliami pisoqarnissaa politiit maanna aalajangiiffigiumaarpaat.

KNR-ip Erik Jensen suliamut atatillugu oqaaseqartinniaraluarpaa, Erik Jensenili Inatsisartut ataatsimiittarfianni ulappunnertik peqqutigalugu allaatigisamik matuminnga KNR-ip aaqqissuisoqarfiata saqqummiussinnginnerani akissuteqarsinnaasimanani.