Erfalasut aappaluttut erfapput: Akit qaffattuartut, akissarsiat qaffanneq ajortut
Ullumi maajip aallaqqaataa - tassa sulisartut nunarsuaq tamakkerlugu ullorsiorfiat.
Nunatsinnilu sumiiffinni arlalinni malunnartinneqarpoq.
Nuummi malunnartinneqarmat, SIK-p kattuffiata erfalasui aappaluttut Nuup aqquserngani ersaripput. Ingerlaaqatigiillu oqariartuutaat aamma ersarippoq:
- Akissarsiat qaffallik! Ineriartornermut malinnaasinnaaniassaagut. Ullut tamaasa akit qaffapput akissarsiagulli qaffanneq ajorput, Klara Fabriciussen oqarpoq, taanna Utoqqaat illuanni Ippiarsummi errorsisarfimmi sulisarpoq.
AAMMA ATUARUK Nuummi portørit suleqqilerput, kisianni suli naammagittaalliorput
- Ilaannikkut akit 10 kr.-mik qaffariataartarput, taamaattoqartillugu tupinnartaqaat, oqarpoq.
Salomine Villadsen, biskopip allaffiani allaffimmiu aamma taama nipilimmik oqarpoq.
- Neriuppunga, Inatsisartuninngaanniit tusarneqarumaarluta, pisiassammi akii qaffakkaluttuinnarput taakkuuppullu annermik eqqartorneqarnerusariaqartut, taanna oqarpoq.
Sapaammi ualikkut SIK-mi ilaasortat Nuup aqquserngatigut ingerlaaqatigiipput. Foto: KNR
Ludvig Larsen, portøritut sulisoq aamma tusaaneqarusuppoq:
- Isumaqatigiinniarnerit kingulliit marluk pingasut angusaqarfiuneq ajorput. Ukiut sisamakkaartumik qaffaasussanngoraangamik taamaallaat koruunialumininnguanik qaffaasarput, suliatsinnullu tamanna naapertuutinngilaq.
AAMMA ATUARUK SIK: Qaammatikkaartumik qaleralittassiisaleqqillik
Taamaammallu maajip aallaqqaataa pingaartuuvoq, taanna oqarpoq:
- Uagutsinnut maajip aallaqqaataa pingaartuuvoq, tassuunakkummi periarfissinneqartarpugut tusarneqarnissatsinnik, suliffimmi atukkagut akissarsiattalu sorsuutiginissaannut, taamaammat ulloq atorluartarparput.
Katuap silataanut allagartarsuit erfalasullu kappussuunneqarput, taqqamanimi oqalugiartoqassammat Foto: KNR
SIK-p siulittaasuata Jess G Berthelsenip oqalugiaammini aamma akissarsiat eqqartungaatsiarpai.
Ersarissarpaalu SIK Namminersorlutillu Oqartussat pisortat suliffeqarfiini sulisut akissarsiaat pillugit suli isumaqatigiittoqanngimmat.
Tassa isumaqatigiinniarnerit marsilli 31-iani naammassineqareertussaagaluartut.
- Sulisartunuku ulluinnarni maani nunami napatitsisut ima soqutaanngissimatiginersut sunnguamilluunniit politikkikkut ilungersuuteqartoqarani taakkua pitsaanerusumik atugassaqartinneqarnissaannik anguniagalimmik? Jess G. Berthelsen oqarpoq, partiimillu nutaaliortoqartariaqarnerarlugu:
- Immaqa nutaamik eqqarsartoqartariaqalerpoq. Immaqa allaat eqqarsartoqartariaqalerpoq maani nunami sulisartunut sullisserusuttunut nutaamik partiiliornissaq - ilami maannakkut sulisartut atugaat annertunerusumik attorneqarusunngillat, oqarpoq nangipporlu:
- Inuiaqatigiinnit paasineqartariaqalerpoq SIK-p nunatta karsiata aningaasivia tigumianngimmagu –timmiarsiummillusooq silugullugit karsip matuersaataanik Naalakkersuisut arsaarsinnaannginnatsigit, SIK-p siulittaasua Jess G. Berthelsen oqarpoq.