Nuummi portørit suleqqilerput, kisianni suli naammagittaalliorput

- Utaqqeqqissinnaajunnaarpugut, naammagittarnerpullu qaangiuppoq.

Portørtit nuna tamakkerlugu suliatigut peqatigiiffianni siulittaasoq Ujarak Jessen Heinrich tusagassiuutinut nalunaarummi taama allappoq.

Tamatumunnga pissutaavoq Nuumi portørit sulinerminni atukkatik pakatsissutigeqimmatigit. 

Sapaatip akunnera kingullermi tallimanngormat portørit pingasuinnaat Dronning Ingridip Napparsimmavissuanut suliartorput, sinnerilu napparsimasutut nalunaarlutik.

SIK naapertorlugu sulinermik unitsitsinerunngilaq, kisianni portørit SIK-p Nammnersorlutillu Oqartussat akornanni isumaqatigiinniarnerit unittoornerat naammagittaalliuutigaat. 

Portørillumi suliartoqqipput, kisianni suliaminni atukkaminnik akissarsiaminnillu naammagittaalliuuteqarnerat suli taannaavoq. 

AAMMA ATUARUK SIK-p siulittaasuata portørip ilorrisimaarutiginngikkai: Suliartoqquakka

Portørit peqatigiiffianni siulittaasoq allappoq isumaqatigiinniarnerit piaartumik naammassinngippata, taava portørit tungaanniit sulinermik unitsitsisoqarsinnaasoq. 

- SIK-p kissaatigisaa tunngavigalugu suliartoqqippugut. Kisianni Namminersorlutik Oqartussat isumaqatigiinniartitaat nikerianngippata portørit sulinermik unitsitsisinnaapput.

Portørit akissarsiaasa naammagittaalliutiginerisa saniatigut peqatigiiffiup aamma marsimi erseqqissarpaa maarlukkaarlutik sulisarnissartik kissaatigalugu aamma atortut nutaat nutaaliallu amigaatigalugit.

Poorskip kingorna nutaarsiassaqassaaq 

SIK portørit sinnerlugit isumaqatiginninniartuusoq marlunngormat oqarpoq isumaqatigiinniarnerit aallarteqqissimanngitsut

Jess G. Berthelsenip SIK-mi siulittaasuusup portørit pakatsisimanerat paasilluarpaa akissarsiaqarnerulernissamillu piumasaqaataat taperserlugu. 

- Ingerlariaqqinnginnitsinnut nutaanik naalakkersuisoqaleratta peqqutaaqataavoq, taakkulu inisseqqaartussaapput. Tamaaleriarpat naatsorsuutigilluinnarpara isumaqatigiinniarnerit aallarteqqissasut, tallimanngormat Jess G. Berthelsen oqarpoq.

Aamma portørit peqatigiiffianni Naalakkersuisut nutaat inisseqqaarnissaat paasineqarpoq, kisianni soorlu oqaatigineqareersutut utaqqikatapput. Portørit peqatigiiffianni siulittaasoq oqarpoq sulinermik unitsitsinissaq aalajangiusimallugu, kisianni qaqugu pissanersoq oqarsinnaanani. 

- Poorskip kingorna takussavarput, Ujarak Jessen Heinrich oqarpoq.

Namminersorlutik Oqartussani Aningaasaqarnermut sulisoqarnermujllu Aqutsisoqarfik KNR-imut oqarpoq portørinik isumaqatigiinniarneq ingerlasoq, kisianni uppernarsinnaanagu isumaqatigiinniarnerit aallarteqqinneqarsimanersut.