SIK: Qaammatikkaartumik qaleralittassiisaleqqillik

Naalakkersuisut Qeqertarsuup Tunuani, Uummannami Upernavimmilu sinerissamut qanittumi umiatsiaararsortunut qaleralittassiisarnerat ukiut qulit kingulliit missaanni qaammammik akulikissuseqartoq, paggalluni aalisarfiusarpoq. Tassa imaappoq aalisartoq aalisarluarnerusoq pisassat nungunnginneranni qaleralinnerusarluni.

Pisasseeriaaseq ukiortaami ukiumoortukkaanngoraluartoq maanna qaammatit pingasukkaalerpoq.

Sulinermik Inuussutissarsiuteqartut Kattuffianni siulittaasup tamanna iluarinngeqaa.

- Isumaqarpunga qangatut ikaarsaaqqittariaqartugut, qaammatikkaartumik pisassiisarneq aallarteqqillugu, Jess G. Berthelsen KNR-mut oqarpoq.

Naalakkersuisoq: Allanngorteqqissinnaavoq

Sulisartut siulittaasuata kissaataa aasamut piviusunngorsinnaavoq. Aalisarnermummi naalakkersuisup pisasseeriaatsimik allannguisaqattaarnertik unittutut suli oqaatigisinnaanngilaa.

- Qaammatit pingasukkaarlugit aaqqiivugut, ukioq affaq naliliinissamut periarfissaqarluta. Imaassinnaavoq ukioq qiteqquppat aamma qaammatikkaartunut uteqqissinnaasugut.

Aqqaluaq B. Egede Qanoruumut oqarpoq.

KNAPK-p Uummannami immikkoortortaqarfiani kattuffiullu SQAPK-p siulittaasua, pisassat qaammatit pingasukkaartunngortinneqarneranni ernummateqarlutik siusinnerusukkut oqarput.

AAMMA ATUARUK Nye regler igen-igen: Naalakkersuisut indfører kvartalskvoter på hellefisk

Seqineq aasamut avannaani kaaviinnalerpat aalisartullu aalisarluarpata pisassaaruteratarnissaq ernumagaat, tamannalu piumanngilaat.

- Uaguttaaq soorunami aamma ernumavugut. Tassami aalisartut aalisanngippata, tulaassuisoqanngippat taava aamma ilaasortagut tunisassiorfinni sulisinnaanngillat, Jess G. Berthelsen oqarpoq.

Naalakkersuisut qaammatinut pingasunut qaleralittassiissutigineqartut tamakkerlugit aalisarneqarpata, aalisarneq unitsinneqassasoq, qaammatinullu pingasunut pisassiissutit tullii atuutilerpata aatsaat aalisartoqaqqilissasoq aalajangiusimavaat.

Qeqertarsuup Tunuani, Uummannami Upernavimmilu umiatsiaararsortut 1281-it qaleralinniarsinnaanermut siornaak akuersissutaateqarput.