Eqqumiitsuliortup Anne-Birthe Hovep suliai nunatsinnut uterput

Eqqumiitsuliat 600-t sinnerpaat, ilisimasallu malillugit maannamut kalaallit eqqumiitsuliaannik ataatsikkut pisinermi annersaasoq, Nuummi eqqumiitsulianik katersugaasiviup pisortaa suliamillu aqutsisoq Nivi Christensen oqarpoq.

- Pissanganaqaaq, annertoqalunilu! Anne-Birthe Hovep suliarpassuami Kalaallit Nunaannut utertinneqarnissai Nunattalu Eqqumiitsulianik Saqqummersitsivianiilernissai nammineq kissaatigisarsimavaa, Nivi Christensen oqarpoq.

Anne-Birthe Hove 2012-imi 61-inik ukioqarluni toquvoq.

Hove nunatsinni eqqumiitsuliortuni immikkuullarinnerit ilagisimavaat. Kalaallini eqqumiitsuliortuni takusanik suliarinneqqittartuni sukuiaasartunilu siullernut ilaavoq, taamaammallu eqqumiitsuliornikkut nalunaajaataa inuiaqatigiinnut nalitoorujussuulluni. Nivi Christensen allappoq.

Eqqumiitsuliat katersat maanna Bornholmimiipput, piffissamilu aggersumi nunatsinnut nassiunneqassallutik. Nunatsinnullu apuuppata katersugaasivinnut agguaanneqassapput nalunaarsorneqarlutillu.

Anne-Birthe Hovep suliaanik Statens Museum for Kunst, Nunatta Katersugaasivia Allagaateqarfialu, Nunatta Eqqumiitsulianik Saqqummersitsiviata Aningaasaateqarfia aamma Nuummi Eqqumiitsulianik Saqqummersitsivik ataatsimoorlutik pisisuupput.