Danskit naalagaaffiata eqqartuussivilersuunneqarnera arnanut, taakkua ilaqutaannut inuiaqatigiinnullumi taamaallaat pingaaruteqanngilaq.

Suliarli ima pingaaruteqartigaaq inatsiseqarnermik suliallit marluk Danmarkimi ataqqineqarluartut suliamut akuussallutik allaat aalajangersimallutik.

Suleqataanissamik aalajangertoq siulleq tassaavoq Advokatsamfundet i Danmark, eqqartuussissuserisut sulinerannik nakkutilliisut innuttaasullu eqqortuliorfigineqartutut misiginissaannik suliniuteqartut.

Kattuffiup allattaanera Andrew Hjuler Chrichton KNR-imut ima oqarpoq:

- Suliaq una (spiralilersuisimanermut tunngasoq, aaqq.) ima pingaaruteqartigalunilu angitigimmat, pineqartut eqqartuussivimmi suliassanngortitsisinnaasariaqartut, tassanilu akisussaanermik inissiisoqaratartariaqartoq taavalu taarsiisoqarsinnaaneranillu aalajangiisoqarluni, kattuffitsinnit isummerfigineqarpoq. 

Tapersiilluni suleqataasoq alla tassaavoq Justitia, eqqortuliortoqarnissaanik inuillu pisinnaatitaaffii pillugit suliniuteqartartoq. 

Aamma Justitiap pisortaata Birgitte Arent Eirikssonip eqqartuussivilersuussineq immikkuullarilluinnartutut nalilerpaa, eqqartuussivimmullu aggersaassummi 'inuit oqaluttuaat assut aalassannartut' atuarneqarsinnaasut oqaatigalugu.

- Spiralilersuisimaneq inuiaqatigiit amerliartornissaraluannut sunniuteqartupilussuuvoq. Arnanut taavalu Kalaallit Nunaata nunatut ineriartornissaraluanut kinguneqartupilussuummat, suliaq una oqaluttuarisaanermi pingaarutilittut inissisimavoq. Inuttut pisinnaatitaaffiit inunnut ataasiakkaanut naalagaaffimmit innarliinernit qanoq illersuitiginersut maanna paasinarsilerpoq.

Aningaasaateqarfiup arnat aningaasartuutissaat tamaasa akilerpai

Aningaasassaaleqinerlu suliap eqqartuussivimmi suliarineqarnissaa aporfiussanngitsoq, suleqataassut Advokatsamfundet aamma Justitia isumaqarput.

Arnat eqqartuussisuserisuminnut Mads Pramminngimut akiliisinnaaniassammata akiligassallu eqqartuussivilersuussinermut tunngasut allat akilerneqarsinnaaniassammata, suleqataasut taakku marluk Dreyers Fondimut Danmarkimiittumut aningaasanik qinnuteqarput akuerineqarlutillutillu. 
 

- Eqqartuussivilersuussinermi aningaasartuutit assigiinngitsut, soorlu akileraarutit allallu akilerneqarnissaat peqataaffigisinnaalerparput, Andrew Hjuler Chichton oqarpoq.  

Arnat eqqartuussissuserisuatalu Mads Prammingip aningaasatigut taperserneqarnerat Dreyers Fondimit KNR-imut uppernarsarneqarpoq. Aningaasalli qasserpiaanersut aningaasaateqarfiup paasissutissiissutigerusunngilaa, Justitiali naapertorlugu qanoq aningaasaliissuteqartiginissaa suli aalajangerneqanngilaq. Arnat naalagaaffimmik eqqartuussivilersuussinerminni ajugaassagaluarpata ajorsassagaluarpataluunniit aningaasartuutit akilerneqassasut isummersoqatigiit paasissutissiipput.

Qaqutiguinnaq tapersiisoqartarpoq

Advokatsamfundip sulianik tapersiisarnera ulluinnarsiutaanngilaq. Amerlanerpaamik ukiumut ataasiaannarlutik tapersiisartut Andrew Hjuler Chrichtonip oqaatigaa. 

Kisianni tassa spiralilersuisimanermik suliaq suliani inuit pisinnaatitaaffiinik unioqqutitsisimanermik unnerluutiginninnermik imalinni danskit eqqartuussiveqarnerata oqaluttuarisaanerani aatsaat takuneqartunik imaqarpoq. Taakkulu inunnut allanut eqqartuussissuserisunullu allanut, inuit pisinnaatitaaffiinik unioqqutitsisimanermik suliassanngortitserusuttunut akissutissarsinissaat pingaaruteqartoq Andrew Hjuler Chrichton oqarpoq. 

- Pisimasut angissusaat inuillu pisinnaatitaaffiinik innarliinerusimasinnaasut eqqarsaatigalugit suliap eqqartuussivimmit aalajangiivigineqarnissaa naleqqulluinnartoq isumaqarpugut. Qanoq pisimasoqartiginersoq pisimasullu qanoq ilungersunartiginersut suliani tapersiissanerluta aalajangiissagaangatta misissortarpagut.

Advokatsamfundilli suliap eqqartuussivimmi suliarineqarnissaanut tapersiinissamik aalajangernera arnanullu tapersiineq assigiinngitsuusut taassuma eerseqqissaatigaa. Inatsiseqarnermummi apeqqutit pingaarutillit akissutissarsinissaat tapersiinermi anguniarneqarpoq. 

Tapersiinissinni illersuisoqalersinaanera, pineqartumilu uani arnat illersorneqarnerulernissaat aarleriginngilisiuk?

- Suliani apeqqutit tunngaviusumik pingaarutillit akissutissarsinissaat peqataaffigisinnaagutsigu, taava innuttaasut eqqortuliortoqarneranik misiginerannut iluaqutaassaagut. Taamaaliornitsinnilu amerlanerit paasinninnerat tusagassiuutillu saqqummiinerat eqqarsaatigineq ajorparput, Andrew Hjuler Chrichton KNR-imut oqarpoq.