Brasiliami juullimi nereqatigiinnissamut naammagittarluni utaqqisariaqarnartarpoq

Nuup ilaani Qinngorpumi, naasut ilaat julestjernimik taaneqartartoq aappaluttoq, naasulivittaa pappiaraq sølviusartikkamik qalligaq qalersalik kusanaqisoq, inissiami qaqungaatsiartumi qalipaateqarpianngitsunillu pisatsersorsimasup igaffianiippoq.

- Unnummi pinnguaatersorfiusumi qaaqqusisuuninni sapaatip akunnera kingulleq tunissutisiaraara, imaallaammi juullerpaluttuuteqalerpunga, Renato Marchesi illalaarpoq.

Brasiliamioq aappassaaneerluni Nuummi juullisiussaaq, siornalu nuannerluinnarsivoq.

- Kammalaatikka marluk qaaqquakka igaqatigiillutalu, najoqqaarujuujutigalutalu qummorortartunik kusanaqisunik isiginnaarluta.

Nunagisaminniit Iranimiit, Vietnamimiit Brasiliamiillu nerisassiarisartakkaminnik nalinginnaasunik immikkut tamarmik nassarput.

-   Brasiliamiut aalisakkamik nerisassioriaasiat malillugu nerisassiorpunga. Bacalao tassaavoq saarullik panertoq, qaammatini arfinilinni qerititsivimmiisinneqartartoq. Akisunersua pissutaalluni nalliuttuni taamaallaat nerineqartarpoq, taanna oqarpoq.

Bacalaoili Nuummi akikinneerarsuarmik nerisassiarineqarsinnaavoq, tassami Renato Marchesimut naleqqulluinnartumi, aalisakkerivimmi Arctic Cod-imi saarulliit amerlasoorpassuanngorlugit amoorneqarsinnaaffianni sulisarpoq.

Illup silataani juullimi grillerineq

Renato Marchesi Brasiliap kujasissuani Curitibami millionilikkaanik inulimmeersuuvoq, decembarimilu aasaasarmat juullimi silatiminni grillerikkajupput. Aneerasaartarfimminili qereqqasumi juulli ukioq manna nalliussinaviarunanngilaa.

- Issittumi, aputilimmi 20 gradisullu nillertigisup misigerngaarnissaa pissanngatiginikuuara. Qulilli ataallugit issileraangat, na’aa, taanna oqarpoq illalaarlunilu.

Renato Marchesi Englandimi Mexicomilu juullisiornikuuvoq, aputilimmiili siorna juullisiorngaarluni.

- Brasiliamiummi 95 procentiisa makku qaqorujuttuusassuit eqqumiitsut takunikuunngisaannarpaat, taanna illarpoq nangillunilu:

- Aputilerujussuaq, issi inuillu juullip inuatut atisalersorsimasut, tassa aatsaat uannut juulli.

Brasilia Kalaallit nunaattulli nunarujussuuvoq, taamaattumik ilaquttat illoqarfeqatigisat juullisioqatigikkajunneqartarput. Taamaattoqanngikkaangalli illuni tamani siatartuuttoqartarpoq.

- 40 gradinik kiatsigisumi qeerlutooq, nerleq qingalissuarlu uunarlutillu pikkunartut nerisarpavut, illalaajutigaluni oqarpoq.

Nerisassanut tunissutisiassanullu utaqqineq

Ukioq manna juullimi angerlarnissaa ilaqutaasa neriuutigisimagaluarpaat. Taamaliussagunili sisamariarluni tallimariarluniluunniit timmisartortariaqartussaassaaq, tamannalu akisuupilussuuvoq. Taamaammat Renato Marchesi, ukiuni kingullerni pingasuni ataasiaannarluni Brasiliamut tikeraarsimavoq.

- Ilaquttama taama ungasitsigisumiinnera nuannarivallaanngilaat, Brasiliamut angerlassannginnersunga ukiut tamaasa apeqqutigisarpaat, taanna nassuiaavoq.

Brasiliami decembarip 24-ani 25-anilu juullisiortarput, nunap inuisa amerlanerpaartaat juullimi aatsaat unnuaqeqqata missaani nereqatigiittarput.

- Unnuaqeqqanut nerineqartussanik, assigiinngitsorpassuarnik nerisassiornerup nalaani, ulloq naallugu nerinaveersaartarneq qangarsuaaniilli ileqquuvoq. Meeqqammi utaqqeqqissinnaajunnaarnerini, decembarip 25-ani ullaakkut poortukkanik puiaasarput, taanna oqarpoq.

Taarfiani qaammaqqusersuineq

Renato Marchesi nunatsinni ileqqoq sorleq nuannarinerpaaneraa aperiganni, imaaliallaannaq akivoq:

- Ulloriaasat! Ulloriaasammi ukiup taarfiani, inunnut qaamanermik neriunnermillu tunisisarneri nuannareqaakka.

Brasiliamiut amerlanerit ilaquttatik eqqissillutik juullisioqatigisarpaat, kingornatigut ukiortaarsiorniarlutik, arsaanniarlutik nuannanniarlutillu sinersorlutik angalasinnaasarput. Sineriammili biilit tunuleriiaat amerlakkajungaarmata, ilai ukiortaarsiorfissaminnut anngutinngitsoortarput.

- Ilaquttagut juullisioqatigisarpavut, tamangajammilli decembarip 26-ani pigisatik poortoriarlugit, kammalaatitik ilagalugit sissamukaasarput.

Ilaqutariit Brasiliameersut Italiamiut ileqquisa ilarpaalui ileqquliunnikuuaat. Taakkunanngalu, soorlu panettone tassaasoq iffiugaq tungusunnitsoq sukkulaateqarlunilu naatitanik panertunik akulik, tamatigut kinguleqqiutigineqartarpoq.

Renato Marchesili nunatsinni allarluinnarmik juullimi kinguleqqiutigisartagassaminik nassaarnikuuvoq:

- Risalamandit mamarilluinnartuuakka. Siorna puugutaq tallimariarpara, taanna qiimmatsalluni oqarpoq.