Politiit ullormut nalunaarutaat: Uummannaq qanittuani nnunaqarfimmiut nannumik naammattuuipput.
Ummannap avannaatungaani Niaqornannguamut pilersaarutaanngerluinnartumik takkuttoqarpoq.
Inuit marluk tulleriiginnarlutik Niaqornannguup eqqaavissuaqarfiani nannumik takunnissimallutik politiinut kaleriuterput.
Kalerriisoq siulleq nalunaaqutaq 15:30 sianerpoq, tullialu 15:40 kalerriisoq, pigaartut politiiat Jeppe Andsager oqarpoq.
Nunaqarfimmi Kommunefogedi piaartumik ilisimatinneqareersorlu eqqaavissuarmut orniguppoq, pilersaarutaanngitsumilli takkuttoq takunngilaa tumaanillu ersittoqarneranik takusaqarsinnaasimanngilaq.
Taamaakkaluartoq inuit marluk takunninnerarmata ilumut nanoqarsimanissaa ilimanarluinnartoq inunnilli ulorianartorsiortoqanngikkallartoq, politiit pigaartuat erseqqissaavoq.
Pisoq pillugu Piniarnermut Aalisarnermullu Naalakkersuisoqarfik nalunaarfigineqartoq ilanngullugu oqaatigaa.
Sisimiuni biilinik ajutoortut
Allatorluinnaq Sisimiuni pisoqarpoq, illoqarfimmimi biilinik ajutoortoqarpoq.
Ippassaq Sisimiut sissaasa ilaanni nalunaaqutaq marlunngulersoq biilinik ajutoortoqartoq nalunaarutigineqarpoq.
Biiliaqqat ATV-nik taaneqartartut biilillu allat aporsimapput.
ATV-nik aquttoq angut 62-nik ukioqarpoq angullu biilertoq 48-nik ukioqarluni.
ATV-nik ingerlatsisoq apornermi kingorna anniarsimavoq, taannalu ikiuiniartartunik napparsimmaviliaanneqarpoq, annerusumilli ajoqusertoqarsimanngitsoq politiit pigaartuat Jeppe Andsager oqaluttuarpoq.
