Politiit ullormut nalunaarutaat: Juullip nalaani pisut - politiit qimmilisartut imigassartorsimallutillu Nuummi biilinik ingerlatsisut
Sapaatit akunnerata naanera ataatsimut isigalugu eqqissisimasimavoq, arlalinnilli pisoqarsimalluni.
Politiit pigaartuisa pisortaat Aputsiaq Hansen taama oqaluttuarpoq.
Imigassartorsimasut eqqissiviilliortitsisut assigiinngitsut saniatigut politiit qimmilisarlutik pisunut orniguttariaqarsimapput.
Hotel Nordbomi tillinniartoqarneranik kalerrisaarut aallartissimavoq, tillinniartoq politiinit qimmilisartunit tigusarineqarpoq, tillinniartoq tassaavoq nukappiaraq ukiukitsoq.
Nukappiaraq pineqartoq tillitaqarsimanersoq politiit ilisimatitsissutigisinnaanngilaat.
Biilit sangujoraartut
Imigassartorsimallutik Nuummi biilinik ingerlatsisut arlallit politiinut arfininngornermut unnuaani kalerriutigineqarput.
- Biilinik ingerlatsisut marluk unnuaanerani unitsinneqarput, taakkualu aaversinneqarlutik. Aaversittut aavat misissorneqassapput, inernerillu kingusinnerusukkut takkukkumaarlutik, imigassartorsimallunili biilinik ingerlatsisoqarsimanissaa politiit pasilliutigaat, Aputsiaq Hansen, politiit pigaartuisa pisortaat, KNR-imut oqarpoq.
Imigassartorsimalluni biilinik ingerlatsisoq siulleq arfininngornermi ullaassakkut nalunaaqutaq tallimanut tanneq aqqaneq nalunaarutigineqarpoq. Biilit niffarlukuni ingerlariaqqissinnaajunnaaqqapput. Angut 50-inik ukiulik biilinik ingerlatsisoq politiinit tigusarineqarpoq.
Imigassartorsimalluni biilinik ingerlatsisup aappaa ullaassakkut nalunaaqutaq tallimat qaanegrlugit pingasut missaanni unitsinneqarpoq. Imigassartorsimagunarluni biilinik ingerlatsisoq tassaavoq arnaq 30-t sinnilaarlugit ukiulik. Taanna aamma ajutoorpoq biiliilu kussinermut nakkarlutik.
