Panamami ikerasaliap USA-mit aqunneqalernissaa Trumpip sioorasaarutigigaa

Amerika Qiterlermi Panamami ikerasaliap USA-mit aqunneqarnissaa USA-mi præsidentinngortussap Donald Trumpip piumasariniarunarpaa.

Inoqatinut nammineq attaveqaqatigiittarfimmini Truth Socialimi taama allaaserisaqarpoq.

Amerikamiut umiarsuaat Panamami ikerasaliakkoornerminni naleqqutinngitsumik akitsuusersorneqartartut Trump isumaqarpoq.

Kinap sumiiffimmi pineqartumi sunniuteqaleraluttuinnarnera aamma ernummatigalugu Trump oqarpoq.

- Panamap ikerasaliaq aquttussaavaa. Kinaanngitsoq nunaluunniit alla. Aqutsisussaanngitsunut tunniunnavianngilarput, Trump ippassaq USA-mi unnukkut allappoq.

Panamap ikerasaliaq taanna 1999-imi aqutarilerpaa. Taassuma siuliani Panama USA suleqatigalugu ikerasaliaq aquppaa.

Panamami ikerasaliaq Amerika Qiterlermi Panamami inissisimavoq, nunallu tamalaat immakkut angallannerannut pingaaruteqarluinnarluni.

Panamami ikerasaliaq inunnit sananeqarpoq, 1914-imilu ammarneqarluni.

Umiarsuit Panamami ikerasaliaq aqqutigalugu Atlantikumiit Manerassuarmukarsinnaapput uterlugulu.

Panamami ikerasaliaqanngitsuuppat umirsuit Amerika Kujallermik uiarterisariaqassagaluarput.

Donald Trump USA-mi præsidentitut aappaagu 2025-mi januaarip ulluisa 20-anni ivertinneqassaaq.