Eqqartuussissuserisup meeraanerminni misileraataasimasunut taarsiissuteqartoqarsinnaanersoq misissoraa
![](/sites/default/files/styles/image_934x467/public/article_images/eksperimentet_0.jpg?itok=hmPb_gTn)
Ministeriuneq, Mette Frederiksen decembarimi utoqqatsissuteqarpoq. Meeraanerminni misileraataasimasut aamma taarsiivigineqarsinnaanersut eqqartuussissuserisup maanna misissussavaa.
Eqqartuussissuserisup taarsiissuteqartoqarnissamut suliaq alla oqallisaangaatsiartoq tassa Danmarkimi nukappiaqqat Godhavnimiinnikut pillugit suliaq aamma suliaraa.
Folketingimut ilaasortaq, Inuit Ataqatigiinneersoq, Aaja Chemnitz Larsen taama paasissutissiivoq.
AAMMA ATUARUK Meeqqat misileraatigineqarsimasut: Mette Frederiksen pisortatigoortumik allaffigalugit utoqqatsertoq
Aamma eqqartuussissuserisup, Mads Prammingip meeraanerminni misileraataasimasut pillugit suliaq suliarileqqammerlugu KNR-imut uppernarsarpaa. Naalagaaffiup eqqartuussivimmut suliassanngortinnissaanut periarfissat taassuma misissussavai – misileraatigineqarsimasullu suli inuusut taarsiivigineqarnissaat anguniagaavoq.
Tamannalu naleqquttoq, Aaja Chemnitz Larsen isumaqarpoq.
Meeqqat 22-t misileraataasumit nunatsinnit Danmarkimut 1951-imi aallartinneqarput.
Taakku ineriartortitsiniarnermut misileraanermi qitiusimapput, meeqqat danskiunerulernissaat nunatsinnullu uterunik maligassiusunngornissaat anguniagaasimavoq.
Meeqqalli angerlaramik oqaatsitik puiorsimavaat ilaquttaminnilu najugaqarsinnaatinneqaratik Nuummi meeqqat angerlarsimaffiannut inissinneqarput.
Meeqqanit taakkunannga 22-nit arfinillit suli uumapput. Taakkulu 80-it missaannik ukioqarlutik.
- Danskit naalakkersuisuisa meeraanerminni misileraatigineqarsimasunut utoqqatseramik iluasaarlutik akisussaanertik nassuerutigaat. Tamanna akuersaarluinnarpara. Meeraanerminni misileraatigineqarsimasunut aningaasatigut taarsiissuteqarnikkut aamma inatsisitigut akisussaaffimmik tigusissapput, tamannalu pissusissamisoorpoq, folketingimut ilaasortaq oqarpoq.
Nukappiaqqanut Godhavnimiissimasunut 300.000-t
Sjællandip avannarpasissortaani meeqqat angerlarsimaffianni Godhavnimi najugaqarsimasuni 17-it paarinerlugaasimanertik pillugu 300.000 koruuninik taarsiiffigineqarnissaminnut isumaqareerlugit akuerisaapput.
Taakkua 17-it danskit naalagaaffiat eqqartuussivimmut suliassanngortereeraallu ministeriuneq, Mette Frederiksen (S) meeqqat angerlarsimaffiini 1960-ikkut 1970-ikkullu akornanni najugaqarsimasut ilarpaaluinut paarinerlugaasimanerannut utoqqatserpoq.
AAMMA ATUARUK Meeraanermi misileraataasimasoq: Nunarput aamma utoqqatsertariaqarpoq
- Danskit naalakkersuisuisa nukappiaqqanut Godhavnimiissimasunut atatillugu akisussaaffik tamaat tiguaat, 17-illu tamarmik immikkut 300.000 koruuninik taarsiiffiginissaannut isumaqatigiissuteqarfigalugit. Naalagaaffiup assigiinngitsuliorlutik Godhavnimiissimasut kisimik taarsiiffigineqarnissaannik qulakkeerinninnerat ajorsoraara, Aaja Chemnitz Larsen oqarpoq.
Taarsiissuteqartoqassannginnerarnikuugaa
Danskit naalagaaffiata meeqqanut misileraatigineqarsimasut utoqqalisunut sinneruttunut arfinilinnut taarsiissuteqarnissaq maannamut itigartitsissutiginikuuaa.
- Kukkussutaanikuusimasumut utoqqatsissuteqarnissaq qitiuvoq, pisimasut akuerinerisigut ilinniarfigaagut, oqaluttuarisaanermi kukkussutit kukkussutigineqaqqinnginniassammata, danskit nunamut imminermut ministeriat, Astrig Krag – ministeriunerup utoqqatserneranit qaammatit tallimat qaangiuttut oqarpoq.
Naalakkersuisuunikuusimasut utoqqatserusunngilluinnarnikuupput. Aamma naak suliap misissuiffigeqqissaarneqarnerani nunatsinni landsrådit misileraateqarnissamut tapersiisimasut takutinneqarluartoq – ilaasortanit 23-nit 19-init meeqqanik Danmarkiliartitsinissamut akuersinikuupput.
AAMMA ATUARUK Udredning: Eksperimentet var ude af kontrol og gav dybe, menneskelige sår
Isumaginninnermut naalakkersuisoq, Martha Abelsen (S) KNR-imut decembarimi ima oqarpoq:
- Suliaq naammassineqartutut isigaara. (...) Mette Frederiksenimiit utoqqatserfigineqareerpugut. Suliaq naammassivoq, Martha Abelsen oqarpoq.