Meeraanermi misileraataasimasoq: Nunarput aamma utoqqatsertariaqarpoq

Nunatta meeqqanit misileraataasimasunit 22-nit suli inuusut arfinillit 1951-imi Danmarkimukartinneqarsimasut inuunerisa qaqugumorsuaq allanngortinneqarsimasut utoqqatserfigisariaqarpai.

76-inik ukiulik, Helene Thiesen taama isumaqarpoq. Taanna arfineq-marlunnik ukioqarluni ilaquttaminit peersitaavoq. Taanna meeqqat allat 21-t peqatigalugit misileraanermut Red Barnetip siuttuuffigisaanut ilaasussanngortinneqarpoq.

Meeqqat danskinngorsarnerunissaat siunertaavoq, taamaalillutik maligassiuisunngorsimallutik nunatsinnut uterumaarmata. Meeqqalli angerlamut uteramik oqaatsitik puiorsimavaat ilaquttaminnilu najugaqarsinnaanatik. Meeqqallu angerlarsimaffiannut inissinneqarput.

AAMMA ATUARUK Mette Frederiksen KNR-imut: Meeqqat misiligaataasut sinnerisa isumaannut iluarusuallaataassasoq neriuppunga

Helene Thiesenip ukiuni qulikkuutaani utaqqisimavaa decembarip ulluisa arfineq-pingajuanni marlunngornermi pivoq. Tassa ministeriuneq, Mette Frederiksen danskit naalagaaffiat sinnerlugu pisortatigoortumik utoqqatsissuteqarpoq.

Helene Thiesenilli danskit naalakkersuisuisa utoqqatserneranut nuannaarutiginnitsigineratullu Namminersorlutik Oqartussat assinganik iliuuseqannginnerat kamaatigitigivaa.

Akisussaaffik annertoqatigigaa

Isumaginninnermut naalakkersuisup, Martha Abelsenip (S) kalaallit naalakkersuisui utoqqatsertariaqanngissoralugit, KNR-imut sapaatip-akunnerata siuliani oqaatigaa. Aamma naak oqaluttuarisaanermi sukuiaanerup nunatsinni landsrådini ilaasortanit 23-nit 19-it akuersineratigut misileraasoqarnissaanut tapersersuisoqarsimanera takutikkaluaraa.

- Suliaq naammassineqartutut isigaara. (...) Mette Frederiksenimiit utoqqatserfigineqareerpugut. Suliaq naammassivoq, Martha Abelsen oqarpoq.

Helene Thiesenillu tamanna kamaatigaa:

- Taama inuppalaanngitsigisumik isumaqartoqarsinnaanera kamaatigalugulu aalassaatigingaatsiarpara. Nunaqqatigaagut. Taakkumi paniat eqqugaasimagaluarpat? Taava allatut oqarsimassagaluartut ilimagaara.

AAMMA ATUARUK Aqqaluk Lynge: Meeraanerminni misileraataasut taarsiiffigineqartariaqarput

- Taamani Danmarkip ataaniikkaluarpugut, kisianni taakku (kalaallit politikerii aaqq.) ataatsimeeqataallutik ”aappimik” ”naaggamilluunniit” akissuteqarlutik nappaapput. Landsrådini amerlanerussuteqartut ”angerput”. Akisussaqataanerat annertoqatigiippoq.

Namminersorlutik Oqartussanit utoqqatserfigineqarneq ilinnut qanoq isumaqassava?

- Isumaqangaatsiassaaq, tassaniimmi aallartiffeqarpoq. Taava sooq utoqqatsissanngillat?

Kalaallit naalakkersuisui nalunngeqatigiinnissutsimikkut allamik iliorsinnaanngitsut, Helene Thiesen oqarpoq.

- Taamani landsråditut isumaqartutut ipput: Aallartiinnarsigit. Angajoqqaavinit avissaartiinnarsigit. Meeqqat angerlarsimaffiannut inissiinnarsigit. Soorlu tamanna ajunngitsoq. Inuunitsinnik arsaarinninneq ajunngissinnaanngisaannarpoq. Inuuneq nalinginnaasoq. Angerlaqqinngilagulluunniit, meeqqalli angerlarsimaffianniilerpugut oqaatigullu annaallugit. Anniaatigisagut tamarmik. Qissatigisagut tamarmik. Pakatsingaatsiarpunga, Helene Thiesen oqarpoq.

Taarsiivigineqarnissaq naatsorsuutigigaa

Danskit ministeriunerata utoqqatsissuteqarnera apeqqut alla takkuppoq, tassa misileraataasimasunit suli inuusunut arfinilinnut aningaasatigut taarsiissuteqartoqassanersoq.

Tassungalu Helene Thiesen qularuteqanngilaq:

- Taarsiivigineqarnissarput naatsorsuutigaara. Amigaataaginnarpoq. Ukiut tamarmik naalliuffigisagut. Arlaatigut tuppallersarneqassanngilagut? Taarsiivigineqarnissarput pissusissamisuussaaq.

Taannali aningaasat qanoq annertutiginissaanut oqaaseqarusunngilaq.

- Tamanna uanga oqaaseqarfigissanngilara, Helene Thiesen oqarpoq.

- Siullertulli nunatsinnit utoqqatsertoqarnissaa kissaatigaara. Aalassatsinneqangaatsiassutigaara.