Aqqaluk Lynge: Meeraanerminni misileraataasut taarsiiffigineqartariaqarput

Meeraanerminni Danmarkimut 1951-imi aallartinneqarlutik misileraaffigineqartut 22-t ministeriunermit Mette Frederiksenimit marlunngormat utoqqatserfigineqarput.

Misileraatigineqartuni arfiniliinnaat suli inuupput, taakkulu ministeriunermit utoqqatserfigitillutik allagarsipput.

Tamannalu ICC-p siulittaasorisimasaata Aqqaluk Lyngep qujamasuutigaa.

Naammanngilarli. Misileraaffigineqarsimasut taarsiiffigineqartariaqartut, taanna isumaqarpoq.

- Isumaqarpunga naalagaaffiup taanna ajornartorsiutigisimagaajaasiit. Tassa taanna taarsiivigineqarnissaq pineqaleraangat ajornartorsiutinngortarami. Isumaqarpunga taakkununnga kiserngoruttunut taarsiisoqartariaqartoq aammalu pineqarsimasut ukua aamma peeruttut naliliiffigineqartariaqartut. , Aqqaluk Lynge oqarpoq.

Qanorli taarsiiffigineqassanersut nalilerusunngilaa.

- Anniarnermut maqaasinermullu ujariatsinermullu qanoq taarsiiffigitittoqassanersoq nalilersinnaanngilara, Aqqaluk Lynge oqarpoq.

Taanna inuit Issittormiut pisinnaatitaaffii pillugit ukiuni 38-ni ilungersuutigisaqarpoq.

AAMMA ATUARUK Mette Frederiksen KNR-imut: Meeqqat misiligaataasut sinnerisa isumaannut iluarusuallaataassasoq neriuppunga

Maanna utoqqatserfigineqarsimalersut nunatsinni siuttunngornissaannik siunertaqartumik meeraallutik Danmarkimut 1951-mi aallartitaapput. Meeqqat 22-t taamani aallartitaapput. Taamaaliorsimanerli inuit pisinnaatitaaffiinik ataqqinnigani iliuuseqarnerusoq, Aqqaluk Lynge isumaqarpoq.

- Nunatsinniittut sungiusimasaminninngaanniit, angajoqqaaminninngaanniit, kulturiminninnganniit oqaatsiminninngaanniillu sorlaanniik amullugit taamatut pineqarsimanerat imaannaanngittuuvoq. Aamma kingornatigut annertuumik sunniuteqartoq.

AAMMA ATUARUK Meeqqat misileraataasimasut ilaat: Utoqqatserfigineqarneq kalaaliminertorlunga nalliuttorsiutigissavara

Danmarkip utoqqatsernissaa sivisuumik piumasarineqaraluartoq ministeriuneq Mette Frederiksen 1951-imi aallartitaasunut aatsaat marlunngormat utoqqatserpoq. Misileraaffigineqartullu taarsiiffigineqarnissaannik kissaateqaraluarluni utoqqatserifigineqarnerat qujamasuutissaasoq, Aqqaluk Lynge isumaqarpoq.

- Kiisami statsministereqarpugut iluamik suliassami uuminnga naammassinnittumik. Taamaattumik statsministeri Mette Frederiksen quttavissaavoq aamma tassani suliami ajunngitsumik inerniliimmat.

Utoqqatsernermi isumalerujussuusoq, Aqqaluk Lynge isumaqarpoq.

- Utoqqatserneq isumaqarpoq, naalagaaffik qanoq iliuuserisimasaminut kukkusunut nassuernera. Aammalu isumaqarpoq, inunnut taakkununnga pineqartunut utoqqatserneq. Taanna annertoorujussuarmik isumaqarpoq.