Mette Frederiksen KNR-imut: Meeqqat misiligaataasut sinnerisa isumaannut iluarusuallaataassasoq neriuppunga

Danmarkip naalakkersuisui kalaallinut meeqqanut 22-nut, 1951-imi Danmarkiliartinneqartunut pisortatigoortumik ippassaq utoqqatserput. 

Meeqqat kulturikkut misiligaanermi siuttuusussaagaluarput: Qallunaanngorsassapput, uterunillu nunatsinni, Danmarkimut suli nunasiaataasumi, pikkorivissortanngussapput qallunaatut oqaluttut.

Ullumi ukiut 70-ingajaat qaangiuttut - meeqqani arfiniliinnaat suli inuupput. 

Utoqqatserneq allakkatigut arfinilinnut taakkununnga ippassaq nassiunneqarpoq. Utoqqatserneq oqaluttuarisaanermik Naalakkersuisut Danmarkillu naalakkersuisuisa misissuisitseqatigiinnerannik aallaaveqarpoq. Misissuineq naammassereerpoq uanilu atuarneqarsinnaalluni. 

Mette Frederiksen, sooruna ministeriunerit allat akerleralugit isumaqartutit, meeqqanut kalaallinut ukiut 70-ingajaat kingorna utoqqatsertoqartariaqartoq?

- Meeqqat, Kalaallit Nunaanniit qimagutsitaasut, eqqunngitsuliorfigineqarsimapput. Ukiorpaat qaangiupput, aap, kisianni ilaat suli inuupput. Nagguimminnik, oqaluttuarisaanerminik, ilaquttaminnik oqaatsiminnillu qallunaanngorsaanermi arsaagaasimapput, Mette Frederiksen (S) KNR-imut oqarpoq.

- Tamatumannga kingunerlutitsingaarsimapput. Taamaammat utoqqatsernissaq eqqortutuaavoq.

Undskyldning til de 22 grønlandske børn, som blev sendt til Danmark i 1951 #dkpol pic.twitter.com/UlmxlqvAWG

— Statsministeriet (@Statsmin) December 8, 2020

Meeqqalli amerlanersaat ilaquttaminnut uteqqinngisaannarput. Danmarkimeereernerminni Nuummi meeqqat angerlarsimaffiannut inissinneqarput - aamma naak nunatsinni angajoqqaaqaraluarlutik. Ilitsoqqussaralugit oqaatsitik annaavaat kalaallisullu oqaloqqissinnaanatik. 

Nuummi meeqqat angerlarsimaffianni qallunaatuinnaq aamma oqaloqqusaapput. 

Suliaq uninngatinneqartuareerluni ukioq manna februaarimi qaqinneqaqqippoq, meeqqallu misileraanermi peqataasut ilaata politikerillu qassiiusut danskit kalaallillu oqartussaasui utoqqatsissuteqaqquaat. Taamanili utoqqatsertoqanngilaq.

Kisianni taamani 1950-ikkut aallartinneranni ilumut susoqarsimanera misissorneqalerpoq. 

Mette Frederiksen ministeriuneqarfimmut ukiup aappaa affaq qaangiuttoq iserterpoq. Meeqqallu misileraataasimasut misissuineq piareeriarpat taakkununnga utoqqatserusulluni kingunitsianngua oqarpoq. 

Sunaana Danmarkip utoqqatsissutigigaa?

- Taamani pisimasut utoqqatsissutigaagut.Oqaluttuarisaanermik maanna misissuisitsereerpugut – taannalu atuarlugu tataannaqaaq. Kalaallit meeqqat taamani akuusut ilarpassui toqoreersimalerput. Inuusut amerlajunnaarput. Kiserngoruttut isumaannut iluarusuallaataassasoq neriuppunga. 

Oqaluttuarisaanermi allamik pisimasoqarsimava, Danmarkip nunasiaatilittut kalaallinut utoqqatsissutigisariaqagaanik?
- Tamatumunnga oqaaseqarnissanut tunngavissaqanngilanga. Tamaat isigissagaanni, oqaluttuarisaanerup immikkoortui taartut akuerisariaqarunarpavut, Mette Frederiksen oqarpoq.

Helene Thiesen meeqqani misiligaatigineqartuni suli inuusortaasunut ilaavoq. Utoqqatserfigineqarnissaq ukiorpassuarni ilungersuutigisimavaa - KNR-imullu ippassaq ima oqarpoq:

- Qamuuna eqarsarlunga; ilumoorpunga kukkupput. Ajortumik pisimavaatigut. Soorlu upperineqarsimananga, aatsaallu upperineqalerlunga.