Nunarput utoqqatsissava? Martha Abelsen akerliuvoq
Meeqqanut 22-nut 1951-imi misiligaataasunut danskit ministeriunerat Mette Frederiksen marlunngormat utoqqatserpat suliaq naammassineqarpoq. Taakkunannga arfinillit ullumikkut ajunngillat, taakkulu ministeriunerup pisortatigoortumik utoqqatserfigai.
Tassungalu tunngatillugu pisup nalaani oqaluttuarisaanermik misissuineq aamma saqqummerpoq, taanna nunatsinni Danmarkimilu oqartussat suleqatigiillutik suliaraat. Isumaginninnermut naalakkersuisoq, Martha Abelsen (S) nammineerluni misissuititsinermi peqataavoq. Ministeriunerlu utoqqatserpat taanna oqiliallassimaqaaq.
AAMMA ATUARUK Meeqqat misileraatigineqarsimasut: Mette Frederiksen pisortatigoortumik allaffigalugit utoqqatsertoq
- Utoqqatserneq nunatsinnut innuttaasunut ataqqinninnermik takutitsinertut uanga isigaara. Kukkunermut nassuerutiginninneruvoq, ingerlariaqqinnissamullu aqqutissaavoq, taanna oqarpoq.
Oqaluttuarisaanermi misissuinermi nalunaarusiaq 90-it missannik qupperneqarpoq. Qulaajaaneq taamani pisut aallaavigalugit suliarineqarpoq, ilaatigut misiligaanermut tunngasut aamma tassani ilaapput.
Landsrådit isumaqataasut
Nalunaarusiami allaqqavoq, taamanikkut landsrådimut ilaasortanit 23- usuni 19-it, 1950-imi meeqqanik isigaanissamut isumassarsiaq taperserneqarpoq.
Landsrådit naalagaaffimmi aalajangiisinnaatitaanngillat, taamaallaalli siunnersuisinnaatitaapput, taamaammat meeqqat misiligaatigineqartussanut tunngatillugu aalajangerneq Københavnimi aalajangerneqarpoq.
Oqartussalli landsrådinit taperserneqarmata politikikkut oqartussat taamatut aalajangerput.
Namminersorlutik oqartussat aamma utoqqatsertariaqaraluarpat?
- Misissuinermi allaaserineqartoq atuarakku, Namminersorlutik Oqartussani arlalinnik oqaluuserisassaqaraluarluta isumaqarpunga, Martha Abelsen oqarpoq.
- Oqallinneq nangitsinissamik malitseqartinneqarnissaa pineqanngilaq – misissuinerli qanoq atorsinnaaneripput. Maannakkut susoqassava – naluara. Naalakkersuisut utoqqatsernissaat uanga anguniagarinngilara.
AAMMA ATUARUK Meeqqat misileraataasimasut ilaat: Utoqqatserfigineqarneq kalaaliminertorlunga nalliuttorsiutigissavara
Sunamiuna oqallisigerusukkit?
- Misissuineq danskisut taamaallaat allaaserineqarnikuuvoq. Kalaallisut suliarineqarnissaa maanna utaqqivarput, taamaalilluni amerlanerusut paasisaqarfiginiassammassuk.
- Ukiut 70-it matuma siorna aalajangerneqarnikoq politikikkut qaqileriffigineqarnissaat, uanga eqqortuusorinngilara.
AAMMA ATUARUK Kielsenip utoqqatserneq tamanit tigulluarneqassasoq neriuutigigaa
Taava imaappa suliaq naammassineqartoq? Tusaasinnaasatsitulli taamaappasinngilaq?
Suliaq naammassineqartutut isigaara. Misissuinerup kalaallisut saqqummersinneqarnissaa amigaataavoq, kisianni danskisut naammassineqareerpoq. Mette Frederiksenimiit utoqqatserfigineqareerpugut. Suliaq naammassivoq, Martha Abelsen oqarpoq.
Meeqqanit taakkunannga 22-init arfiniliinnaat suli inuupput. Ilarpassui ajornartorsiuteqarlutik, soorlu inuunerlullutik, atornerluillutik ilaallu imminoriartarsimallutik.
