Kielsenip utoqqatserneq tamanit tigulluarneqassasoq neriuutigigaa

Ministeriunerup Mette Frederiksenip meeqqanut 50-kkunni misiligaataasunut utoqqatsernera Naalakkersuisut siulittaasuata Kim Kielsenip naalagaaffeqatigiinnermi ajunngitsup tungaanut alloriarnerusoq isumaqarpoq.

- Naalagaaffiup maannakkut utoqqatsernera ajunngitsup tungaanut alloriarnertut oqaatingerusuppara, aamma tatigeqatigiinnermut annertusaavoq, Naalakkersuisut siulittaasuat, Kim Kielsen KNR-mut oqarpoq.

AAMMA ATUARUK Meeqqat misileraataasimasut ilaat: Utoqqatserfigineqarneq kalaaliminertorlunga nalliuttorsiutigissavara

Kalaallit meeqqat 22-it 1951-imi pikkorivissortunngoqqullugit Danmarkiliartinneqarput.

Taakkunannga arfinillit danskinut ilaqutariinnut meeravissianngortinneqarput sinnerilu ukioq ataaseq qaangiummat Nuummi meeqqat angerlarsimaffianniilerlutik, naak amerlasuut nunatsinniittunik angajoqqaaqaraluarlutik.

Attortittoq

Naalakkersuisut siulittaasuata pisumut qulaajaaneq atuaramiuk attortisimassutigaa.

- Qulaajaanerit atuaraanni annernarnerpaaq unaavoq, kinaassuseerussimapput, oqaatsitik kalaallit oqaasii annaasimavaat, ilaquttatik qaqutigorujorujussuaq takusarsimavaat ilaasaluunniit takusarsimanngilaat. Taamaammat taakkununnga utoqqatserneq alloriarnertut annertuutut oqaatigerusuppara, Kim Kielsen oqarpoq.

AAMMA ATUARUK Aaja Chemnitz Larsen: Ajuusaarpunga, killitsisimaalaartungaliuna

Taassuma utoqqatsernerup tamanut iluaqutaanissaa neriuutigaa.

- Uannut Naalakkersuisut siulittaasuattut pingaarpoq oqaatigissallugu: Neriuppunga ministeriunerup pisimasunut tunngatillugu utoqqatsernera tingulluarneqarumaartoq, Kim Kielsen oqarpoq.

Kielsen: Akisussaaffimmik tigusineruvoq

Naalagaaffimmit utoqqatseqqusineq nunatsinni Danmarkimilu ukiuni kingullerni oqallisaajuartarpoq. Piviusunngortinneqarneralu nuannaarutaaqaaq.

- Nuannarivippara ministeriuneq Mette Frederiksen akisussaaffik tigulluarlugu aammalu ataqqinnilluni utoqqatserusuttoq, Kim Kielsen oqarpoq.

Meeqqani 22-suni ullumikkut inuusut arfinillit allakkatigut ippassaq utoqqatserfigineqarput.

AAMMA ATUARUK Mette Frederiksen KNR-imut: Meeqqat misiligaataasut sinnerisa isumaannut iluarusuallaataassasoq neriuppunga

Meeqqat misileraataasut eqqunngitsuliorfigineqarsimasut, utoqqatserfigineqarnerallu pissusissamisoortoq, ministeriuneq KNR-imut ippassaq oqarpoq.  

- Meeqqat, Kalaallit Nunaanniit qimagutsitaasut, eqqunngitsuliorfigineqarsimapput. Ukiorpaat qaangiupput, aap, kisianni ilaat suli inuupput. Nagguimminnik, oqaluttuarisaanerminik, ilaquttaminnik oqaatsiminnillu qallunaanngorsaanermi arsaagaasimapput.

- Tamatumannga kingunerlutitsingaarsimapput. Taamaammat utoqqatsernissaq eqqortutuaavoq, Mette Frederiksen KNR-imut oqarpoq.