Aaja Chemnitz Larsen: Ajuusaarpunga, killitsisimaalaartungaliuna
Danskit ministeriunerata, Mette Frederiksenip, meeqqat kalaallit 1951-imi Danmarkiliartinneqartut pisortatigoortumik ullumikkut marlunngornermi utoqqatserfigai.
Meeqqat misileraatigineqarsimasut 22-t isumaginninnikkut misileraanermi ilaasimapput, taakkualu kalaaliussutsiminnik iperaanissaat nunatsinni danskisuullaqqinnerpaanngornissaat siunertaasimavoq.
Misileraatigineqarneralli iluatsinngilaq. Meeqqammi taakkua 22-t ilarpassui nalaassimasamik kingunerlutsitsipput, imigassamik ikiaroornartumillu atornerluisunngorput ilaallumi imminoriarsimallutik.
Taakkunannga suli inuusut arfiniliinnaapput.
Tussunngusut
Nunatsinnit Folketingimi ilaasortat marluk, Aaja Chemnitz Larsenip (IA) Aki-Mathilda Høegh-Damillu (Siumut), danskit ministeriunerata pisortatigoortumik utoqqatsernerata nalunaarutigineqarneraniit nalunaaquttap akunnera qaangiutereersorlu Folketingimi apeqqarissaarfigineqarnerani tussunngullutik qutsavigaat.
- Utoqqatserneq qujaruteqaarput – ajuusaarpungalu killitsisimaalaarninnut, Aaja Chemnitz Larsen Folketingip ataatsimiittarfiani oqarpoq.
AAMMA ATUARUK Meeqqat misileraatigineqarsimasut: Mette Frederiksen pisortatigoortumik allaffigalugit utoqqatsertoq
- Utoqqatsernissannut sapiissuseqarninnut qamannga pisumik qutsavigaakkit. Ataatsimut oqaluttuarisaanerput misigissutsikkut taarsiornartunik immikkoortoqarpoq – immikkoortullu taakku nunatta Danmarkillu akornanni naligiinnissamut akimmisitsisuupput. Naligiinneruleqqulluta qanoq iliorniarpit?
- Ilumoorpoq ataatsimut oqaluttuarisaanerput taarsiornartumik immikkoortoqartoq. Meeqqat misileraatigineqarsimasut amerlanerpaartaat toqoreerput. Taakkunannga ilaat tamaviaarnartumik inuuneqarput, tamannalu ataatsimut oqaluttuarisaanitsinni immikkoortuuvoq taarsiornartoq, Mette Frederiksen akivoq.
- Qanormiuna saammaateqatigiinniartugut? Ajunnginnerpaamik siunertaqarluni misileraasoqarsimavoq, tamannali mileraanermi ilaasut ilungersunartunik nalaataqarnerannik kinguneqarluni. Iluamik utoqqatsernissarput naligiimmik suleqatigiinnissatsinnut tunngaviussaaq, Mette Frederiksen oqarpoq.
Ilimagisatut utoqqatsertoq
Aki-Mathilda Høegh-Damip Mette Frederiksen aamma qutsavigaa:
Aki-Mathilda Høegh-Damip ministeriuneq qutsavigigaa. Assi: Scanpix
- Inuiaat kalaaliusugut qasagineqarnerarpugut. Ministeriuneq meeqqanut misileraatigineqarsimasunut Danmarkip naalagaaffia sinnerlugu utoqqatserneranut iluunngarlunga qutsavigaara. Sapiissuseqarneranut nersorpara. Kalaaliusugut tamarluinnangajatta ilunnguvugut. Taakkua tamaasa sinnerlugit: Qutsavigerujussuarpakkit.
Mette Frederiksen ima akivoq:
- Meeqqani misileraatigineqarsimasuni kiserngoruttutuannguit ilaata kingullermik nunatsinniikkama naapinnera ataqqinaatitut isigaara. Qularnanngivissumilli ilungersunartorpassuarnik nalaataqarsimapput.
- Inuit kulturikkut kinaassusiiarneqarsinnaanngillat. Ataatsimut oqaluttuarisaanitsinni eqqunngitsuliortoqarsimaneranik miserratiginninnata qulaajaanissatsinnut sapiutissanngilagut.
Mette Frederiksen ilimagisatut utoqqatserpoq. Taannami kalaallit meerartaannut misileraatigineqarsimasunut utoqqatsernissamik Bornholmimi siorna juunimi Qassimiuaartoqarnerani neriorsuuteqarpoq.
Oqaluttuarisaanermilli aatsaat qulaajaasoqareerpat taamani utoqqatsissanerarpoq - oqaluttuarisaanermillu qulaajaaneq tamanut ullumi marlunngornermi saqqummiunneqarpoq.
Naalakkersuisut danskillu naalakkersuisui oqaluttuarisaanermik qulaajaaqatigiipput, taannalu uani atuarneqarsinnaavoq.
