Eqalussuup amii mutiliassatut
Isumassarsiamik ingerlatsisuuvoq Nauja Lynge Lyngesen suleqatigiinnut ilaasunit Arctic Designersimeersoq.
- Amermik taamaattumik tuniniaanissamut ussassaaruteqarnissamut piffissaq eqqortuuvoq. Tassami ilaatigut puisit amii atorumaneqarunnaariartorput, ilaatigullu atisanik mutiliortartut puisit amiinut taarsiullugit atorsinnaasaminnik nutaaliarisinnaasaminnillu ujaasileruttormata, Nauja Lynge Lyngesen oqarpoq.
Ilaatigut pilersaarutaavoq eqalussuup amii tamaasa paasissutissanik elektroniskiusunik pilersorneqassasut, taakkunani paasissutissiissutigineqassallutik eqalussuarmut tunngasut, Nunatsinnut tunngasut, aamma aalisartunut ilisimatusarnernullu tunngasut. Taamaalilluni tunisassiaq iluaqutigalugu paasissutissanik siaruarterisoqassammat.
Eqalussuup amiata tuniniarneqalernissaanik isuma nunani tamalaani maluginiarneqareersimavoq.
- Atisanik mutiliortartut maanna nunarsuup avannaa alaatsinaappaat, aamma eqalussuup amia eqqortumik takkorliunneqarpat, Kalaallit Nunaat ammit mutiliornerlu pillugit oqallisaallualissagaluarpoq, taama oqarpoq atisanut mutinut nunani tamalaani immikkut ilisimasalik Mathias Wagner.
