- Lars-Emil Johansen-ni piffissaajaatiginianngilara. Lars-Emil Johansen-ip naalakkersuisut siulittaasuattut unammillerluni inatsisartunut qinigassanngortinniarluni saqqummiussineranut naalakkersuisut siulittaasuat Hans Enoksen taama akissuteqarpoq.
- Sinnarliuutiginngeqqissaarpara aamma siulittaasunngoramali taamaliortuarpaanga. Tamanna uanga piffissamik atuiffiginianngilara. Piffissamik atuiffigerusuppara inuiaqatima pitsaasumik sullinneqarnissaat, nunatsinnilu angalasarnini ajornartosiutit annertuut takusartakkakka aallaavigalugit sulerusuppunga minnerpaarpaamilluunniit Lars-Emil Johansen-mut nukikka piffissaajatiginianngilakka.
Lars-Emil Johansen piffissami sivisuumi isorinnittarpoq Hans Enoksen naalakkersuisut siulittaasuattut tunuartariaqartoq atorfimmut naleqqutinnginnami.
- Lars Emiili Siumut ataatsimeersuarmat peqataavoq, periarfissaqarsimagaluarlunilu uppititsinissaminut, kisianni taamaaliunngilaq, siulittaasullu tullianut aamma unammilleraluarpoq qinerneqaranili.
Hans Enoksen-ip pingaarnerpaajunerarpaa inuit ataasiakkaat anguniagaat pinnagit inuiaqatigiit qanoq pitsaasumik atugaqartinnissaata nukinnik atuiffiunissaa.
Lars-Emil Johansen oqarpoq qinersinermi nammineq taaguunneqarnerpaassangaluaruni taava qinersinerup kingorna Siumup iluani naalakkersuisut siulittaasunngortinneqarsinnaani isummerfigineqarsinnaasariaqartoq.
- Ataatsimeersuarnermi naqissusikkat ataqqivakka allanngortinneqassappatalu aatsaat ataatsimeersuarnikkut aaqqiisoqarsinnaavoq, Enoksen akivoq.
Lars-Emil Johansen-ip naalakersuisut siulittaasuannut unammillernera Siumumi tassa avissaartuunnermut takussutissaannginnersoq aperineqarami Hans Enoksen akivoq:
- Avissaartuuttoqanngilaq. Ajorsarsimasut kisimik massakkut malugeqquniarlutik taama pisaqattaarput.
Qinersinerup kingorna Siumut naalakkersuisunngortitseqqissappat Hans Enoksen-ip naalakkersuisut siulittaasuuinnarnissi aalajangiussimanerarpaa. Lars-Emil Johansen-ip imminerminit amerlanerusunik taaguunneqassagaluarpat Hans Enoksen-ip ernumanartoqartinnginnerpaa.
Inuiat Ataqatigit naalakkersuisooqataasimasut siulittaasuata Josef Motzfeldt-ip Siumumi massakkut pisut ajuusaarnartuunerarpai, Siumumillu suleqateqaqqinniarnissaq tamanna pillugu assut ajornakusuussangtikkini oqarpoq.