Emanuel Nûko pinngitsuutitaasoq: Qujamasoqaanga
Emanuel Nûkop Tasiilamiilluni, Eqqartuussiveqarfik Sermersuumi sapaatiummat unnerluutigineqarpoq.
Taanna 2021-imi maajip 16-iani unnukkut qulip missaani imigassartungaatsiarsimalluni nakuusersimasoq, politiinullu annersitsiniaasimasutut unnerluussumi KNR-ip pissarsiaani allaqqasoqarpoq.
Emanuel Nûko sapaatiummat unnerluutigineqarnermini pinngitsuutinneqarpoq.
AAMMA ATUARUK Emanuel Nûko pinngitsuutinneqarpoq
Taanna Eqqartuussiveqarfik Sermersuumi eqqortumik pineqarluni misigisimanerarpoq:
- Ajunngilanga, qujavunga suliaq eqqortumik naammassilluarmat. Oqaaseqarnaveersaarnikuuvunga pissutigalugu, allagaatit takoqqaarusunnikuugakkit. Eqqunngitsumillu unnerluunneqarsimallunga paasivara, taanna oqarpoq.
Taanna inoqatiminut annersitsinanilu politiinut annersitsiniaasimanani KNR-imut oqaluttuarpoq.
Unnerluutigineqartunut marlunnut Emanuel Nûko pinngitsuutinneqartoq, illersuisua Naja Joelsenip KNR-imut sapaatiummat upernarsarpaa.
- Inuttut assut nukittorsaataaqaaq. Nukittornaqaaq, nukippassuit atornikuuakka tassunga. Taamaammat massakkut eqqortup inissinneqarnera assut qujarutigaara, Emanuel Nûko oqarpoq.
Suliaq ingerlateqqinneqarataannaasoq
Emanuel Nûko Naleqqameersoq, inatsiartunut ilaasortaavoq, Kommuneqarfik Sermersuumilu kommunalbestyrelsinut ilaasortaalluni.
Emanuel Nûkop eqqartuussaanissani siorna septembarimi nammineerluni paasissutissiissutigaa, tamatumalu kingorna Inatsisartut matoqqasumik ataatsimiinnerminni taassuma unnerluutigineqarsinnaannginneranik atorunnaarsitsinissartik aalajangerpaat.
Emanuel Nûko unnerluutigineqarnermi kingunitsianngua Inatsisartunit Kommuneqarfik Sermersuumiillu sulinngiffeqannginnissamik qinnuteqarpoq.
Illersuisup oqaluttuaraa, suliap ingerlateqqissinnaaneranut unnerluussisussaatitaasoq ulluni 14-ni eqqarsarnissamut periarfissaqarnissaminik kissaateqarsimasoq.
Taamaattumik suliaq ingerlateqqinneqassanersoq suli ilisimaneqanngilaq.
AAMMA ATUARUK Politiit Emanuel Nûko aalakoortoq qasilitsortalimmik seqqaraat
Unnerluussisussaatitaasup piumasarigaluarpaa, Emanuel Nûko ulluni 30-ni pineqaatissinneqarsimasunnut inissiisarfimmiittussanngortinneqarnis-
saa.
Emanuel Nûko Naleqqameersoq qinikkatut sulilluni politikeriullunilu Inatsisartuni Kommuneqarfik Sermersuullu kommunalbestyrelsiani ilaasortaammat, taassuma eqqartuussivilersuunneqarnera tusarliupparput.
Taamaammat tamanna tamanut saqqiummiunneqartariaqartoq, KNR isumaqarpoq.
Taassuma Inatsiartuni sulinngiffeqarallarnini septembarip naaneraniit maajip naanissaata tungaanut atuunnissaa suli naatsorsuutigalugu KNR-imut oqaatigaa.
- Massakkut ilaquttakka najorpakka, nuliara meeqqagullu najorpakka Tasiilami.
Emanuel Nûkop eqqartuussivimmi sassartinneqarnissani nammineerluni Inuit attaveqatigiiffianni Facebookimi nammineerluni siorna septembarimmi nalunaarutigaa.
Pinaasertoq qasilitsortalimmik seqqarneqartariaqartoq
Emanuel Nûko nakuuserniartutut pissusilersorsimanera tamanullu ammasumi toqqissiviilliorsimasutut maajip ulluisa 16-ianni 2021-mi unnukkut qulinngoriitsiartoq Tasiilami tigusarineqartoq, unnerluussisussaatitaasup allagaani tamanna takuneqarsinnaavoq.
Politiit peqqussutaannut naalakkumanngilaq, politiinullu qunusaaraluni.
Politiit Emanuel Nûko seqqartaammik qasilitsortalimmik seqqarpaat, tigusaralugulu.
Unnerluussut naapertorlugu Emanuel Nûko unnerluutigineqarpoq politiit malittarisassaannik unioqqutitsisimasutut Kommuneqarfik Sermersuup malittarisassaanik paragraf 18-ip immikkoortuani 3-mik kiisalu pinerluttulerinermik inatsimmik 88-mik unioqqutitsisimasutut.
Kommuneqarfik Sermersuumi politiit ileqqoreqqusaanik unioqqutitsineq tassaavoq, politiit peqqussutaannik unioqqutitsineq imaluunniit malinnikkusunngitsoq.
Pinerluttulerinermi inatsimmi paragraf 88 nakuusersimanermut tunngassuteqarpoq.