Emanuel Nûko Naleqqameersoq eqqartuussivimmi sassassasoq

Partii Naleraq sinnerlugu inatsisartunut ilaasortaq Emanuel Nüko eqqartuussivimmut sassartinneqartussanngorpoq.

Inuit attaveqatigiiffianni Facebookimi nammineerluni tamanna nalunaarutigaa.

Taama pisoqarpoq, Inatsisartuni ilaasortap unnerluutigineqarsinnaannginnerata atuukkunnaarsinneqarnera pillugu Inatsisartut ippassaq matoqqasumik ataatsimiittoqarnermi aalajangertoqarmat.

Unnerluutigineqarsinnaannginnerata atuukkunnaarsinneqarnera sumut tunngassuteqarnersoq paasissutissiissutigineqanngilaq

AAMMA ATUARUK Inatsisartuni ilaasortap unnerluutigineqarsinnaannginnerata atuukkunnaarsinneqarnissaa aalajangerneqartoq

Emanuel Nûko inuit attaveqatigiittarfianni Facebookimi ippassaq ima allappoq:

- Tassa uangaavoq ullumi unnerluunneqarsinnaannginnera atorunnaarsinneqarpoq, politiit suliaat silaannarmiittoq naammassinissaanut annertunerusumik oqaaseqarsinnaanngilanga, qujavungali tamanna suliarineqartussanngormat piareersimaffigalugulu, Emanuel Nûko Facebookimi allappoq.

Emanuel Nûko apersorneqarusunngilaq. Eqqartuussivimmili suliap naammassinissaata tungaanut Inatsisartunut ilaasortaassalluni KNR-mut oqarpoq. 

Taanna illersuisussaminik nassaarsimalluni aamma oqarpoq. Illersuisulli kinaanera oqaatigerusunngilaa.

Naleqqameersumut Emanuel Nûkomut politiit suliaqartut, Naleqqami siulittaasup, Pele Brobergip uppernarsarpaa. Suliarli sumut tunnganersoq oqaaseqarfigerusunnagut.

Emanuel Nûkop unnerluutigineqarsinnaannginnera Inatsisartunit atorunnaarsinneqarpoq, tamanna qanoq isumaqarfigaajuk?

- Naleqqamiit tamakkiisumik taperserparput tunngaviatigut tamatigut, Inatsisartut inatsisit ataaniinnissaat taamaammallu unnerluutigineqarsinnaannginnerata atorunnaarsinneqarnissaa tapersernikuuarput, Pele Broberg oqarpoq.

Emanuelip Inatsisartuni ingerlaannarnissani nammineerluni KNR-imut oqaatigaa. Illit ilaasortavit ilaat eqqartuussaasussaq Inatsiartuni ingerlaannarniarnera qanoq isumaqarfigaajuk? Ileqqorissaarnerua?

- Emanuel Nukop ingerlaannaarnissaa qulakkiissallugu Naleqqamiit siulittaasutut akuersissummik tunisinikuuvunga, Pele Broberg oqarpoq, taannali itinerusumik oqaaseqarusunngilaq.

Inatsisartunut ilasortat unnerluutigineqarsinnaannginnerminnut illersugaapput, kisianni innuttaasut allat assigalugit politiinit paasiniaaffigineqarsinnaapput unnerluutigineqarlutillu.

Eqqartuussivinnili suliassanngortitsisoqassatillugu, unnerluunneqarsinnaannginera inatsisartunit atorunnaarsinneqarsinnaavoq.