Nuummi qinersisut: Kuannersuit isumaginninnerlu aalajangiinaatsiarput
Kuannersuarni tunngasumik oqallinneq innuttaasut qinersinissaanut aalajangiisuungaatsiarpoq. Kisianni aamma meeqqanut isumaginninnermullu tunngassuteqartut pingaartinneqaqaat.
Inussivimmi ullaaq qulingiluanit qinersisoqarsinnaalermat, qinersisartut qinersiartorlutik isaalerput.
Inatsisartunut Nuummi innuttaasut qinersisut nalunaaqutaq ataatsimut 921-iupput. Kommunimut qinersisimasut 884-iupput ilagiillu sinniisissaannut qinersisut 543-ullutik.
Jeanett Christoffersen ulloqeqqaanngitsiartut qinersisut ilagaat. Politikerit qineqqusaarnerminni politikki pivallaarnagu inunnik ataasiakkaanik eqqartuiavallaartut, taanna isumaqarpoq.
- Isumaqarpunga qineqqusaarneq imartuallaanngitsoq. Tusagassiuutini inunnut ataasiakkaanut tunngasut sammineqarnerusut malunnarpoq, soorlu Siumumut kommunimullu tunngasunik qineqqusaarnermi, taanna oqarpoq.
Suliarli ataaseq Inatsisartunut qinersinissamini pingaartippaa.
- Soorunami kujataani Kuannersuit initungaatsiarpoq. Tassalu kimut taasinissannut taanna nalilersuutaangaatsiarpoq.
Taassuma Inatsisartunut kommunimullu qinersinerit siuliini qinikkani qineqqinnianngilai. Ilaatigut Narsap eqqaani Kuannersuarni aatsitassarsiornermut suliniut peqqutaasoq taanna oqarpoq.
- Maanna ilisimasaqarnerullunga misigisimavunga. Qinersinerlu kingulleq eqqarsaatigissagaanni ukiuni kingullerni isummakka allanngoriartornikuupput, Jeanett Christoffersen, oqarpoq.
Kuannersuit isumaginninnerlu pingaartinneqartut
Nuummi qinersisartut allat KNR-ip oqaloqatigai. Naapitatta ilaatigut nunatsinni inuussutissanik nammineq pilersuinissaq, nunatta avataaniit sulisussarsiorneq meeqqallu atuarfii pingaartippaat.
Qinersisartunilli oqaluussaqarnitsinni sammisat marluk uteqattaarput: Tassalu Kuannersuarni aatsitassarsiorsinnaanermut apeqqut isumaginninnermullu tunngasut.
Nuummi qinersisartut ilaata Helene Geislerip, qineqqusaarnermi sammisat aalajangersimasut suut pingaartitarinerlugit oqaluttuarinngilai.
Aammli taanna qinersinermit kingullermit qinikkaminit allaanermik qinersivoq.
- Demokratiimi inooqataanitsinni kiffaanngissuserput, innuttatut pingaaruteqarmat qinersinissaq, qinersiartorpunga, taanna oqarpoq, nangillunilu:
- Allaanerusunik qinersivunga. Isumaqarama ilinniarluarsimasut aamma nunatsinni aqutseqataanerulertariaqartut, taamaattumik ilinniarluarsimasunik taajuivunga.