Dronningi inuuimmini balkonimit aamma ukioq manna aalaaterinavianngitsoq
Dronningip inuuini aamma ukioq manna malunnartingaarnianngikkaa, kunngikkormiut tusagassiuutinut nalunaarput.
Dronningi apriilip ulluisa 16-ianni 81-iliissaaq. Dronningi inuuissioraangami innuttaasunut aalateriartortarluni Amalienborgip balkonngianukartaraluarpoq, ukioq mannali taamaaliornavianngilaq.
Paarsisut ulloqeqqanut nikinneranni, inuit illussaarsuup saavanukarlutik dronningip inuuiani pilluaqqusiartortaraluarput.
Inuuinili coronap ilungersunartorsiortitsinera pissutigalugu Fredensborg Slotimi ukioq manna nammineq malunnartinniarpaa.
AAMMA ATUARUK Qamutilittarneq erinarsoqatigiinnerlu: Dronningi facebookikkut nalliussineqassasoq
Dronningip siorna 80-iliinnissaanik nalliuttorsiortitsinermi aaqqissuussarpassuugaluit taamaatinneqarmata inuuia allatut nalliussineqarpoq. Interneti aqqutigalugu pilluaqqusisoqarlunilu assigiinngitsutigut malunnartitsisoqarpoq.
Kunngikkormiut internetikkut attaveqaataat aqqutigalugit ukioq manna pilluaqqusisoqarsinnaassaaq.
Dronningimummi pilluaqqusinissamut attaveqaatitigut qupperniliortoqassasoq, kunngikkormiut tusagassiuutinut ilisimatitsipput.
Dronningip inuuia kunngikkormiut internetikkut attaveqaatitigut quppernerisigut ulloq naallugu nalliussineqassaaq.