Dronning peqatigalugu kaffillertunut siuleriiaattorpassuusut
Dronning qaqutiguinnaq kaffillertunukartarpoq.
Taannali Nuummi kulturikkut illorsuarmut, Katuamut ippassaq kaffisoriarpoq. Kommuneqarfik Sermersooq biskoppeqarfillu nalunaaqutaq 14.30-mit 17.00-ip tungaanut tassani kaffillerput.
Katuaq inunnik ulikkaarpoq, silataanilu inuit 200-init 300-inut amerlassuseqassagunartut utaqqipput. Ilaasa dronningip takulaarnissaa neriuutigaat - ilaallu kaffillertunut iserusullutik.
Juliane sisamanik ukiulik Jakobilu pingasunik ukiulik silataani nillertumi utaqqisut ilagaat.
Assi: Malik Brøns
- Dronning alakkarparput, Juliane oqarpoq.
Taassuma arnaa Bolette Dam Nuuk Centerip tungaanit Katuap isaariaata eqqaanut siuleriaattuni qeqqisimavoq.
- Meeqqat pillugit maaniippugut, dronningillu takunissaa neriuutigaarput.
Assi: Malik Brøns
Inger Johanne, Emma Jakobsen, Jonas Andersen aamma Marianne Frydendal Aarhus Universitetiani nakorsaatinut tunngasunik ilinniartuupput, taakkulu Dronning Ingridiup Napparsimmavissuani qaammatini marlunni sulillutik.
- Dronning takuniarlugu maaniippugut. Sutornermi oqaluuserineqangaatsiarpoq, tikinnissaalu peqqissaasunit tusarparput.
- Dronning siornatigut takunikuunngilarput - Danmarkimilu najugaqarlunga, Emma Jakobsen oqarpoq.
- Aap, tupinnalaarpoq Nuummut angalaqqaarluni takusinnaallugu, Jonas Andersen oqarpoq, nangillunilu:
- Kalaallit Nunaannik soqutiginninnermik takutitsinissaa tassunga pingaaruteqartoq eqqarsarpunga.
AAMMA ATUARUK Biskop-inngortitsineq: Paneeraq Siegstad Munk pingajussaanik iluatsitsivoq
Emma Jakobsen ilanngussivoq:
- Danmarkip Kalaallit Nunaatalu ataqatigiinnera tukappasilaarpoq - taamaammat taassuma soqutiginninnini isumaqartitsininilu takutissallugu pingaartissimassavaa, Emma Jakobsen oqarpoq.
Assi: Malik Brøns
Sidse, Lilly, Martha, Ane Nikkulaallu Katuaq silataani pissangallutik aamma utaqqipput. Taakku dronningi biskoppinngortinneqaqqammersorlu takunissaat pissangagaat.
- Aatsaat taamatut ivertitsisoqarneranik isiginnaarpunga. Alutornarput, taakku oqarput.
Taakku dronningi Nuummeernerani takulaareersimavaat.
- Uanga takulaaginnarpara. Biiliniittoq takulaarpara. Kisianni aalaterinnginnermik suami aalaterilaarpoq, taanna ippinnaqaaq, susunnguakkuluunerpoq, immaqa utoqqarmut puiortalersimasoq. Taamaammat massakkut takulluarusukkaluaripput.
- Kisianni aamma kaffisoriartulaarusukkaluaratta, inoqangaarmat immaqa isiginngiinnassaagut.... Kaffimik nunguussaagunaratta isiginngiinnassaagut.
Nalunaaqutaq 15.20-nngortoq landroveri qernertoq Dronningimik ilaasoqarluni kulturikkut illorsuup saanut apuuppoq. Taannalu borgmesterimit, Charlotte Ludvigsenimit (IA) biskoppinngoqqammisumiillu Paneeraq Siegstad Munkimit tikilluaqquneqarpoq.
Hans Egedep Oqaluffiani biskoppimik iversitsineq dronningip peqataaffigisaa naammasseqqammerpoq. Dronningi oqaluffimmut kalaallisoorpoq, maannalu atequteqarluni puisip amianik sanaajumik takisuumik atugaqarpoq.
Dronningip Nuummut tikeraarnera ullumi qaangiuppoq, Pituffimmullu ingerlaqqilluni. Angalanini naggaserlugu aqagu Station Nordimukassaaq kingornalu Danmarkimut uteqqissalluni.
