Doris: sumiginnaasarneq akiortigu
Maanna suleriaatsit iliuuserisat ingerlatiinnarlugit Naalakkersuisoqarfiit assigiinngitsut kommunillu peqatigalugit sumiginnagaanerup mumisinnissaa aallartittariaqalersoq, Doris Jakobsen oqarpoq.
- Uani Birgit Hansenip oqariartuutigisaa isumaqatigaara, oqariartuutigimmagumi ajornartorsiut qaangernavianngikkipput ilaatigut soorlu sumiginnaaneq taama annertutigisoq akiornianngikkutsigu, peqqissutsimut naalakkersuisoq Doris Jakobsen oqarpoq.
Aamma atuaruk Atassutip inuusuttatik taperserpaat
Birgit Hansen ernisussiortup siusissukkut iliuuseqarnermik suliaqartuni atorfillip KNR-mut oqaatigaa, nunatsini naartuersittarnerit amerlavallaarnerat ukiorpassuarni ajornartorsiutaasup oqallisigineqaleraangat ajornartorsiutip qiterisaanut sammiveqartannginnera naammagilerlugu. Tassami sumiginnaagaanerup kingunerisarmagu kissaatiginagu naartulersartut naartuersittarneri.
Aamma atuaruk Naartuersittarnermut oqallinneq allamorujussuaq sangusoq
Peqqissutsimullu Naalakkersuisup maanna aaqqiissutit atuinnarlugit suliaqarfinni arlalinni suleqatigiinnissaq aallartikkusuppaa:
- Tassa naartuersittarnermut tunngatillugu suliniutit ingerlareerput, peqqinnissaqarfimmi atuarfeqarfinnilu, taakkualu ingerlaannassapput. Kisianni taakkua saniatigut sumiginnaasarneq annertunerusumik sammisariaqarparput, naalakkersuisoqarfiit, kommunit allallu aporfeqanngitsumik suleqatigiilluta.
Aamma atuaruk Naartuersittarnerpassuit Dorisip ikilisikkusuppai
Sumiginnaanerlu qaangissagaani ilinniagaqarsimatillunilu perorsaataasumik ilinniarnerup iluani pissarsisoqartarmat Doris Jakobsenip ilinniarnissamut kajumissaarinerunissaq oqallinnermut ilanngukkusuppaa:
- Isumaqarpunga atuartoq atuarfimmininngaanniit anigaangat nakkutigineqarnera ingerlaannartariaqartoq angajoqqaavi attaveqarfigisarlugit, ilinnialernersoq imaluunniit suliffissaaleqinersoq. Suli ingerlariaqqinnissaannik kaammattorlugu, peqqissutsimut naalakkersuisoq Doris Jakobsen oqarpoq.
