Politikki

Atassutip inuusuttatik taperserpaat

Naartuersittartut amerlavallaarput. Oqallinnerullu ilaani Atassutip inuusuttaasa naartuersittarnerup akeqalernissaa siunnersuutigaat. Atassullu partiip qullersaata inuusuttami siunnersuutaat toqqaannartumik isumaqatiginngikkaluarlugu tamanna nalilersoqqaarlugu aalajangiisoqarnissaa siunnersuutigaat.

Allattoq Nauja Møller, Paarnaq Hansen

septembarip 29-at 2015 12:41

- Taanna nalilersugassaassooq toqqaannartumik isumaqatiginngikkaluarlugu massakkorluinnaq, kisianni siunissaq eqqarsaatigalugu isumaqatiginarpoq, Paninnguaq M. Kruse atassut sinnerlugu Inatsisartuni sinniisutut ilaasortaq, atassummilu siulersuisuunerni ilaasortaq KNR-mut taama oqarpoq.

Aamma atuaruk Naartuersittarnermut oqallinneq allamorujussuaq sangusoq

Ullaaq manna siulersuisuunerit ataatsimiinneranni naartuersittarneq pillugu oqallinneq ataatsimiinnermi eqqartorneqarpoq, isumaqarpullu Atassutip inuusuttai tigussaasumik siunnersuuteqartut. Tamannalu nalilersoqqissaaqqaarlugu aalajangiunneqassasoq.

Aamma atuaruk Atassutip inuusuttai: Naartuersinnerit akeqalerlik

Atassummiillu isumaqarput naartuersittarnerit akeqalissagaluarpata akiliutaasartut nunatta karsianut nakkartiinnarnagit pinaveersaartitsinernut atorneqartussatut inissinneqassasut.

- Ajornartorsiut tamanna qaangerniassagutsigu aamma aningaasartaqarami sunaluunnit aaqqissuussaq, sunaluunnit anguniagaq tamatigut malitseqartarami aningaasanit taamaattumik taakkua malitsigisinnaavaat aaqqiissutit matussutissatut atorneqarsinnaasunngorlugit, Paninnguaq M. Kruse taama oqarpoq.