VIDEO Naartuersittarnermut oqallinneq allamorujussuaq sangusoq

Ukiumut naartuersittartut 800-jut sinnerpaat. Kisitsit annertupput, meerartaarineqartartuniillu amerlanerullutik, tamatumunngalu tunngasunut oqallineq annertuseqqavoq. Siunnersuutigineqartoq kingulleq tassaavoq naartuersittarneq akeqalersinneqassasoq.

Oqallinnerlu allamorujussuaq sangusoq ernisussiortoq paarisap ataani siusissukkut iliuuseqarnermik sulialik isumaqarpoq.

Naartuersittarnerup akeqalernissaanik oqallinneq arnallu ajornartorsioreeqisut tikkuartornissaat tulluartuunngilaq. Ajornartorsiutip tunngaviginerpaasaa, tassa sumiginnaasarneq oqallisigineqalerniarli, ernisussiortoq Birgit Hansen isumaqarpoq.

- Atuisut akiliuteqartalernissaat aaqqiissuuteqarniarneq eqqortuunngilaq. Eqqugaasussat tassaapput arnat ajornartorsiortut, siullertut akiliinissamut akissaqanngitsut. Taava inuiaqatigiit akiliisussanngussappat? Taamaaliornikkullu aammaarluni ilerasunnermik kanngusunnermillu peqareersunut annertunerulersitsissaaq, arlaannilluunniit ikiutaanavianngilaq, ajunnginnerusumillu aaqqiinissamut ikiutaanaviarani, killormoortuanilli pisoqassaaq, Birgit Hansen ernisussiortutut, perorsaasutut kinguaassiutinullu tunngasunut ilisimaqarnissamut ilinniarsimasoq, maanna siusissukkut iliuuseqarnermik suliaqarfimmi atorfilik oqarpoq.

Aamma atuaruk Atassutip inuusuttai: Naartuersinnerit akeqalerlik

Taanna ukiuni tyveni nunatsinni najugaqarsimavoq, naartuersittartut meerartaartartunullu tunngasunik annertuunik ilisimasaqarluni.

- Arnamik naammattuuisimanngisaannarpunga naartuersittarneq naartunaveersaatitut atoraa. Arnarpassuarnik naapitsisaannarpunga naartuerseqattaartarsimasut, arlaannillu tunngaveqartuaannartoq ilisimavara. Angerarsimaffimmi peroriartorsimaguit persuttaaneq, kinguaassiutitigullu atornerlugaaneq ulluinnaralugu, naartuersinnissaq soqutaavallaanngilaq.

Taamaattumik isumaqarpoq oqallinneq iliuuseqarnissarlu ajornartorsiutip qiterisaanut saatinneqartariaqarpoq.

- Isumaqarpunga siammasinnerusumik isiginiarneqartariaqartoq, assersuutigalugu ukiuni 30-ni sumiginnagaasartunut kisitsisit allanngorneqanngillat. Taakkuli kisitsit ingerlaqatigiipput. Imminut paarinissaq isumassuinissarlu ilikkarsimanngikkaanni inersimasunngorluni imminut paarisinnaanngillat. Taamaattumik amerlasuut kissaatiginagu naartulersarput, Birgit Hansen oqarpoq.

Aamma atuaruk Naartuersittarnerpassuit Dorisip ikilisikkusuppai

Maniitsumilu peqqissaasup Karolina Olsenip taanna isumaqatigaa.

Naartuersinniarluni akiliisalernissaq isumaqatiginngilaaq. Ukiunilu 13-ni sulinermini maniitsumi arnat naartuersittartut kikkuusut ilisimasaqarfigilernikuuai. 2013-mi naartuersittut 44-sut 95,5 procentii arnaapput ilinniagaqarnatillu suliffeqanngitsut. Arnat naartuersereersimasut, aammalu meerartaaqqinnissaminnut akissaqanngitsut.

Birgit Hansenilu isumaqarpoq erseqqarivissumik maanna ajornartorsiutaasup qaangerniarnissaanut aqqut suli ungaseqisoq. Iliuusererusutaalu atuisunut akiliisitsinerunngilaq.

- Maanna tamakkiisumik ikiussallugit ilinniagaqanngilagut, anguneqarsinnaavorli. Qanoq iliuuseqartoqarnissaa oqallisigissavarput, iluamik oqaluussisinnaalernermut pikkorissarneq, aamma suliaqartut qanoq ilinniartinnissaat. Isumaqarpunga arnat oqaloqatiginissaannik qaaqquullugit aperalugillu qanoq ikiortariaanersut suullu naartunaveersaatit atussaneraat aperalugit, ullullu 14-nit qaangiuppata qaaqqoqqillugit agginngippatalu ujartorlugit, Birgit Hansen taama oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat