Doris qinigaaqqinngitsoorpoq, taavami?
Inatsisartunut 138-nik kommunalbestyrelsemullu 78-inik taaguunneqarneq, Doris Jakobsen Jensenip politikkimik qinikkatut suliinnarnissaanut naammanngillat.
- Soorunami siullermik pikkunakujuppoq kisianni aamma siunissamut nutaamik allanik eqqarsarnermik pilersitsivoq. Qinersineq sioqqullugu eqqarsaatigisarnikuuvara ilinniagara atorlugu sulineq misilittagaqarfigerusullugu, taamaattumik isumaqarpunga alloriaqqinnissannut una periarfissiisoq matut matugaangata matut allat nutaat ammartarmata.
Doris Jakobsen Jensen 1978-imi inunngortoq inuusuttuararsuullunili sassarternermik piginnaasaqarpoq. Ilulissani Mathias Storchip atuarfiani suli atuartuulluni atuartut sinniisaanni siulittaasunngorpoq:
- Ilulissani taamani imminut toquttorpassuit tusarsaapput, taamaattumik atuarfiup pisortaa piumaffigiartornikuuvara oqaloqatiginnittarfimmik pilersitsissasoq – Doris oqarpoq. Nangillunilu:
- Tassa tassanngaanniit sassartertarneq aallartippoq, kingorna inuusuttunngorama 1992-imi Siumup inuusuttaani ilaasortaalerpunga, Aasiannilu immikkoortortaqarfimmi 1996-imiit 1998-imut siulittaasuullunga.
Politikki qimakkuminaatsikkaa
Dorisip politikki imaaliallaannaq qimannaviarnagu oqaatigaa. Siumup siulersuisuunerinut ilaasortaavoq, Kommuneqarfik Sermersuumilu kommunalbestyrelsemut sinniisussamut siulliulluni. Doris kommunalbestyrelsimut sinniisutut inississanersoq, inatsisartut inissitsiternerisa takutissavaat. Tassami Siumut tunuliaqutaralugu ilaasortaq kommunalbestyrelsimut aamma qinigaavoq, taannalu Inatsisartunut qinigaanikuummat sinniisussaq siulleq issiavimmut ingerataannaavoq.
Illit inuusullutit politikkimut iserputit, inuusuttorpassuit Inatsisartunut aamma kommunemut qinersinitsinni isertut qanoq kaammattorsinnaavigit?
- Politikki taamatut iserfigalugu inuusuttuulluni soorunami sakkortusinnaasarpoq kisianni inuuneq tamarmi ilinniarfiuvoq. Nikallujaalluni ingerlaannarnissaq taanna pingaaruteqarpoq, neriuppungalu aamma taakkua inuusuttut ilinniakkaminnik naammassisimanngippata aamma politikki kisiat pituttorfiginagu ilinniarnerminnik inuunermi arlaatigut naammassinnikkumaartut.
Doris Jakobsen Jensen Ilisimatusarfimmi Inuiaat kulturiat oqaluttuarisaanerlu pillugit bacheloritut ilinniarsimavoq, maannalu kandidatitut immikkut allaaserisani tunniutissallugu piareersarlugu.
Kim Kielsenip Inatsisartuni siulittaasunngornerata kingorna, Doris Kommuneqarfik Sermersuumi kommunalbestyrelsemi sinniisussatut siullertut isissaaq.
