OL Doris Jakobsen Jensen OL-erfiusumut tapersersuiartortoq
- Ukiuunerani OL-ip ammarnersiorneqarnerani najuunnissannut aamma Laila Friis-Sallingimut Martin Møllerimullu tapersersuinissannut qilanaartorujussuuvunga, Doris Jakobsen Jensen oqarpoq.
Martin Møllerip Laila Friis-Sallingillu OL-imut peqataanerat KNR-imit malinnaavigineqassapput:
11. feb - 30 km skiathlon, Martin Møller
16. feb - 15 km sukuutserneq, Martin Møller
19. feb - Halfpipe kval., Laila Friis-Salling
20. feb - Halfpipe finale, Laila Friis-Salling
24. feb - 50 km qangatut, Martin Møller
Pyeongchangimi OL-ertoqarnera februaarip ulluisa 9-annit 25-ata tungaannut pissaaq.
Kultureqarnermut naalakkersuisoq aaqqissuussap ammarnersiorneqarnerani, timersornermut naalakkersuisut allat ilagalugit, peqataassaaq.
Taavalu aamma ujakkaartartup Martin Møllerip unammeqqaarnera, sapaammi februaarip ulluisa 11-anni pisussaq, najuuffigissavaa.
AAMMA ATUARUK Unamminissami siullermut peqataanngiinnarnissani eqqarsaatersuutigaa
Nunatsinneersut OL-imut peqataanerat pitsaasumik takutitsinerusoq, naalakkersuisoq isumaqarpoq:
- Nalunngilara, maannakkut peqataanerinnaalluunniit Kalaallit Nunaanni timersornermut pitsaasumik sunniuteqassasoq, tamatuma takutippaa, ilungersortumik angusassamillu toraagaqarluni suliniuteqarnikkut nunarsuatsinni pitsaanerpaanut ilannguttoqarsinnaasoq. Qularutiginngilara Martin Møller aamma Laila Friis-Salling meerartatsinnut inuusuttortatsinnullu amerlasuunut maligassiuisuusut, naalakkersuisoq allappoq.
AAMMA ATUARUK Martin Møller OL-erfissamut tikereerpoq
Kunngissaq Frederik kalaallinut qallunaanullu tapersersuiniarluni aamma najuutissaaq.
Kunngissaq Nunat Tamalaat OL-imut ataatsimiititaliaanni, IOC-mi, Danmark sinnerlugu ilaasortaasoq, februaarip qulingiluaanit 25-ata tungaanut najuussaaq, Doris Jakobsen Jensenilu februaarip qulingiluaanit aqqaneq-aappaata tungaanut najuussalluni.
