OL Unamminissami siullermut peqataanngiinnarnissani eqqarsaatersuutigaa
Martin Møller, skiathlonimik taasagaanni 30 kilometerinik isorartussusilimmi OL-ertoqarnerani sapaatiuppat peqataasussaagaluarpoq.
Ujakkaartartorli 37-nik ukiulik ajornartorsiuteqalersimavoq, nuffasersimagamimi. DR.dk-mut taama nammineq oqarpoq:
- World Cupimi unammiuaarnerni assigiinngitsunut ullut qulit matuma siornatigut peqataavunga. Tassani aatsaat taama ingerlalluartigaanga, kisianni kingorna nuffaserpunga, sapaatillu-akunnerata kingulliup ingerlanerani iluamik piareersarsinnaasimanngilanga, Martin Møller oqarpoq.
Martin Møllerip Laila Friis-Sallingillu OL-imut peqataanerat KNR-imit malinnaavigineqassapput:
11. feb - 30 km skiathlon, Martin Møller
16. feb - 15 km sukuutserneq, Martin Møller
19. feb - Halfpipe kval., Laila Friis-Salling
20. feb - Halfpipe finale, Laila Friis-Salling
24. feb - 50 km qangatut, Martin Møller
Pyeongchangimi OL-ertoqarnera februaarip ulluisa 9-annit 25-ata tungaannut pissaaq.
AAMMA ATUARUK Martin Møller OL-erfissamut tikereerpoq
OL-ertoqarneranilu unamminissami siullermi, sapaatiuppat pisussami, peqataannginnissani maanna eqqarsaatersuutigaa. 50 kilometerinik isorartussusilimmut qangatut ujakkaarnissamut piareersarluarnissani maanna siunniunniarpaa.
- Nikallungassutigisariaqanngilara, OL-ertoqarneranimi isorartussutsit pingasut peqataaffigisussaavakka, siullerlu sapaatiuppat pisussaalluni, taannalu immaqa peqataaffiginngikkukku pitsaanerussaaq, unamminerillu sinnerini marlunni sukataarneruinnassaanga, Martin Møller oqarpoq.
Martin Møllerip peqataaffigisassai tassaapput 30 kilometererluni skiathlonerneq sapaatiuppat pisussaq, 15 kilometererluni sukuutserneq, februaarip 16-ani pisussaq, qangatullu ingerlaarluni 50 kilometererneq, februaarip ulluisa 24-anni pisussaq.
AAMMA ATUARUK Talentarbejde skal skabe nye OL-atleter
