OL Martin Møller OL-erfissamut tikereerpoq
Martin Møller nalunaaquttap akunnerini 24-ni angalareerluni OL-ip illoqarfittaanut ataasinngormat tikippoq, Danmarkip OL-komitea facebookimi taama allaaserisaqarpoq.
OL-ip illoqarfiani ullormi siullermi, marlunngornermi, ujakkaartartut atugassarititaasut misissorsimavai.
AAMMA ATUARUK Piareeqqavunga
Martin Møller sisoraatinik pujassaanermut atortut løjpellu misilissimavai.
- Aputeqarpallaanngilaq, taamaattorli isseqaaq, allaaqqippoq seqinnerlunilu, komite taama allappoq.
Martin Møllerip ujakkaarluni unamminerit pingasut peqataaffigisussaavai, februaarillu aqqarnani unammeqqaartussaavoq, tassani 30 kilometerinut athlonissaaq, tassalu klassiskimik 15 kilometerit kingornalu fristilimik 15 kilometerit.
Martin Møllerip Laila Friis-Sallingillu OL-imut peqataanerat KNR-imit malinnaavigineqassapput:
11. feb - 30 km skiathlon, Martin Møller
16. feb - 15 km sukuutserneq, Martin Møller
19. feb - Halfpipe kval., Laila Friis-Salling
20. feb - Halfpipe finale, Laila Friis-Salling
24. feb - 50 km qangatut, Martin Møller
Pyeongchangimi OL-ertoqarnera februaarip ulluisa 9-annit 25-ata tungaannut pissaaq.
Martin Møllerip sisorartartoq Danmarkimeersoq sisupiloornermi unammisussaq, Christoffer Faarup, kisiat maannamut OL-ip illoqarfianeeqatigaa. Taakku kisiartaallutik maannamut OL-erfissamut tikissimapput.
AAMMA ATUARUK Laila Friis-Salling misigisassarsiorniarpoq
DIF-ip OL-imut atatillugu tusagassiinermut akisussaasuata Jakob Draminskyp KNR-imut oqaatigaa freestylemik sisorartartoq Laila Frii-Salling alpinimillu sisorartartoq Casper Dyrbye pilersaarutit malillugit sisamanngornermi ullaakkut tikissasut, tassalu nunatsinni nalunaaqutaq malillugu pingasunngorpat unnukkut.
OL februaarip qulingiluaani ammaanersorneqassaaq.