Siumut Nuuk nutaamik siulittaasoqalerpoq Doris J Jensen borgmesterinngorusuppoq
Doris J Jensen ulapittussanngorpoq. Tunngaviusumik Inatsisissaq pillugu isumalioqatigiissitaq Doris J. Jensenip marlunngornermi siulittaassuufigilerpaa. Sapaatip akunnerata siuliatalu naanerani Doris J Jensen Siumut Nuup immikkoortortaqarfiani siulitaasunngorpoq.
Siumut Nuuk suliniutit pingaarnerit marluk tusagassiuutinut nalunaaruteqarlutik saqqummiuppaat.
Siumut Borgemesterinngortitsissaaq
Siullermik : Siumut Kommuneqarfik Sermersuumi inisseqqinnissaa.
Kommuneqarfik Sermersuup ingerlanneqarnera akuerinngilarput, Siumut Nuuk taama allappoq.
Doris J Jensenip isumaginninnikkut suliat eqqaavai, meeqqat sumiginnarneqartut, angajoqqaarsiat atugaat aamma innuttaasut imimikkut ittunik pisariaqartitsisut Doris J. Jensenip isumaa naapertorlugu kommunimit sumiginnarneqartut.
Siumut Nuup akuerisinnaanngilaa ajornartorsiutit ajorfilittanut miloriutiinnarneqassasut:
-Isumaqarpugut piffissanngortoq akisussaaffimmik qimarratiginngitsumik aqutsisoqalerniassaa
Siumup immikkoortortaqarfiani siulittaasunngortoq taama oqarpoq.
borgmester Asii Chemnitz Narupip isornartorsiut ima akissuteqarfigaa:
- Siullermik oqaatigilaassavara ukiorpanngortunik suliniuterparpassuarnik inuunerissaarnissamu qulakkeerinnittussanik akuersissuteqartarsimagatta. Taamaakkaluartoq soorunami meerartatta pitsaanerusumik ikiorserneqarnissaasa pitsaanerpaanngortinnissaa suli angusimannginnatsigut, Asii Chemnitz Narup oqarpoq.
Taassuma assersuutitut nassuiarpaa, Tasiilami piviusulersaarut pillugu Kommuneqarfik Sermersuumi Ilaqutariinnermut pisortap Martha Lund Olsenip DR-imi tusagassiortunik oqaloqatigineqartariaqarnera, borgmester Asii Chemnitz Narup oqaloqatigineqartussaagaluarluni piffissap kingulleq atorlugu taamaatissimammagu.
Borgmesterili akisussaaffimmik qimarratiginninnginnini ima oqaasertalerpaa:
- Misissuisoqarsimatillugu nalunaarusianik saqqummiusisoqarneri tamaasa suliniaqataajuartarpunga. Misissuinerillu aallaavigalugit pitsanngorsaatissanik ujartuijuartarsimallunga, taamammat isornartorsiut akisussaaffimmik qimarratiginninneraaneq ilisarisinnaanngilara, Asii Chemnitz Narup oqarpoq.
Kingullemik kommunemut qinersisoqarmat, qinersisartut 28,2 procentiisa Siumut qinerpaat, IA 43 procentinik taamaalilluni kommunemi pissaaneq tiguniaraani anguniagassaq ungasippoq.
Taamaattumik tamanna qanoq anguneqassanersoq siulittaasunngortup qularutiginngilaaa
- Siunissami qaninnermi Siumut Nuup siuttunngoqqinnissaa anguniarlugu nukigut tamaasa atussavagut, Doris J Jensen oqarpoq.
AAMMA ATUARUK Doris J. Jensenip Tunngaviusumik inatsisissaq pillugu isumalioqatigiissitaq siuttuuffigissagaa
Nunaqavissunik atorluaanissaq
Suliassani pingaaruteqartut aappaa imaappoq.:
Nunaqavissunik atorluaanerunerulernissaq
Siumut Nuup anguniarpaa atorfilittaqarneq aammalu nunaqavissunik suliffiutilinnik atorluaanerulernissaq
Siulitaasunngortullu nalunaarutaa ersarippoq:
- Kommuneqarfik Sermersuumi ullumikkut avataaniit atuinerujussuaq sakkortuumik isornartutut isumaqarfigaarput, soorlu aamma allaffissuarmi nunaqavissut suliffiutillit mattussuuneqartarlutik oqariartuuteqartarput, Siumut Nuummi siulitaasunngortoq Doris J Jensen oqarpoq.
- Tamanna eqqunngilluinnarpoq, borgmesteri oqarpoq.
AAMMA ATUARUK Doris J. Jensen Naalakkersuisunit tunuarpoq
Siulersuisut nutaat ukuupput.
Siulitaasoq: Doris J. Jensen
Siulitaasup tullia: Ilatsiaq Markussen
Aningaaserisoq: Thora Ludvigsen
Siulersuisuni ilaasortat: Peter Davidsen
Isak Davidsen
Jens Kristian Berthelsen
Bent Møller
SIS-imit aallartitaq: Lea Birthe Olsen
Sinniisussat: Marianne Laursen,
Bitten Høegh Dam, Lars Jørgen Kleist