Donald Trump: Kisermaassillunga naalakkersuilernavianngilanga - taamaallaat ullormi siullermi

USA-mi præsidentimut aappaagu qinersinermi ajugaassagaluaruni kisermaassilluni naalakkersuilerniannginnini, USA-p præsidenterisimasaata Donald Trumpip erseqqissaatigaa.

USA-mi naalagaaffiit ilaanni Iowami qinersisartunut ippassaq marlunngornermi ataatsimiisitsinermi taama oqarpoq. Nutaarsiassaqartitsivik Reuters taama allaaserisaqarpoq.

Ataatsimiitsitseriaaseq town hallimik taaguuteqarpoq, innuttaasut ataatsimiigiaqataasut tassani apeqquteqarsinnaallutik.

- Naagga, kisermaassillunga naalakkersuilernavianngilanga, taamaallaat ullormi siullermi, Trump USA-mi præsidentimut aappaagu 2024-mi novembarip ulluisa tallimaanni qinersinermi ajugaassagaluaruni kisermaassilluni naalakkersuilersaarnersoq aperineqarami erngertumik akivoq.

Præsidentitut ivertinneqarnerup kingorna ulloq siulleq Trumpip atorluarniarpaa, præsidentitut pissaaneqarnini USA-p Mexicomut killeqarfianik matusinissamut atorniarlugu, uuliasiorluni qillerisoqarsinnaanissaanut akuersissutinik akuersiniarluni.

Trump qinersinermi ajugaassagaluarpat USA-mi kisermaassilluni naalakkersuisoqalersinnaanera demokratit republikanerillu ernummatigaat.

Tamat oqartussaaqataanerat atuutsinneqarnani inuup ataatsip sukannersumik aqutsilernera autokrati eqqunneqariaannaasoq isumaqarput.

Donald Trumpip, republikaneriusup, demokratillu sinnerlugit USA-mi maanna præsidentiusup Joe Bidenip, USA-mi præsidentimut aappaagu qinersinissami inaarutaasumik qinigassanngortinneqarnissaattut maanna isikkoqarput.