Isumasiuineq: Qinersisoqaraluarpat Trump Bidenimut naalagaaffinni tallimani ajugaassagaluarpoq
USA-p præsidentia, Joe Biden, USA-mi præsidentimut ullumi qinersisoqaraluarpat, kingoraakkaminut præsidentiusimasumut Donald Trumpimut USA-mi naalagaaffinni pingaarutillinni arfinilinni tallimani ajorsassagaluarpoq. Inunnik isumasiuinerit tamanna takutippaat.
Aviisi The New York Times Siena Collegelu inunnik isumasiuisuupput.
USA-mi præsidentimut ullumi qinersisoqartuuppat Donald Trump, republikaneriusoq, naalagaaffinni Arizonami, Georgiami, Michiganimi, Nevadami Pennsylvaniamilu 4 aamma 10 procentpointit akornanni qinersiseqarnerussagaluarpoq.
Naalagaaffiit arfinillit akornanni Joe Biden Wisconsinimi taamaallaat ajugaassagaluarpoq, 2 procentpointinik ajugaassagunaraluarluni.
Naalagaaffiit pineqartut arfinillit ataatsimut isigigaanni, Biden agguaqatigiissillugu 44 procentinit taaguunneqassagaluarpoq, Trumpilu 48 procentinit taaguunneqassagaluarluni.
Biden naalagaaffinni arfinilinni taakkunani præsidentimut 2020-mi qinersinermi ajugaavoq.
Naalagaaffiit isumasiuiffigineqartut ataasiakkaat kisitsisit 4,4 aamma 4,8 procentpointit missaanni nalorninartortaqarput.
Naak Trump eqqartuussivitsigut assigiinngitsutigut sassartinneqartussaagaluartoq, Trump republikanerit præsidentimut aappaagu 2024-mi novembarimi qinersinermi sassartitassaattut ilimagineqarnerpaavoq.
