Trump unnerluutigineqaraluartoq suli præsidentitut qinigaaqqissinnaasoq

Naak USA-mi siornatigut præsidentiusimasoq Donald Trump unnerluussutinik nutaanik unnerluutigineqaraluartoq, præsidentitut suli qinigaaqqissinnaavoq.

Niels Bjerre Poulsen, USA-mut tunngasuni Syddansk Universitetimi lektori taama naliliivoq.

- Parnaarussaaqqagaluarluni præsidentiusoqarsinnaavoq, taanna oqarpoq.

Donald Trumpimut unnerluussutit nutaat assigiinngitsut sisamat USA-mi ataasinngornermi saqqummiunneqarput.

Donald Trump USA-mi naalaagaaffimmik peqquserlunniarsimasutut, pisortatigoortumik sulinermik akornusersuiniarsimasutut pisinnaatitaaffinnullu tunngasunik akornusersuiniarsimasutut ilaatigut unnerluutigineqarpoq.

USA-mi inatsisartut Washington D.C.-mi ataatsimiittarfiannik 2021-mi januaarip ulluisa arfernanni saassussisoqarnerata kingorna Trumpip misissuiffigineqarneranit unnerluussutit saqqummiunneqarput.

USA-p tunngaviusumik inatsisaa naapertorlugu periarfissat siammasipput, assersuutigalugu Trump paasissutissanik isertugaatinik toqqorsisimasutut unnerluutigineqarluni Floridami pisuutinneqassagaluarpat suli præsidentinngorsinnaavoq.

USA-mi præsidentit arlaannaalluunniit parnaarussaaqqanikuunngilaq, parnaarussaaqqanerulli nalaani parnaarussivimmit siornatigut qineqqusaartoqarnikuuvoq.

Eugene Debs, socialistiusoq, sorsunnersuup siulliup kingorna parnaarussaaqqasoq parnaarussivimmit 1920-mi qineqqusaarpoq.