Kalaallit karatertartut danskit pissartanngorniunneranni angusaqarluartut
Danmarkimi Shotokan Karatemi sapaatip akunnerata naanerani unammersuaartoqarpoq, Nuuk Shotokan Karate-do-milu karatertartut peqataapput.
Nunatsinneersullu arlalinnik ujaminnapput.
Nuuk Shotokan Karate-do tusagassiuutinut nalunaarummi allapput.
- Klubbimi piginnaasaqarluartoqaleriartorpoq, tamannalu unammisaqarnikkut misiligarneqassaaq. Unammisarfimmimi ilisarinngisamut unammineq ilikkagaqarfiungaatsiartarpoq, sungiusaasoq, Kasper Dyrberg tusagassiuutinut nalunaarummi allappoq.
Taassuma inuusuttut unammigiartippai.
Unammersuaarnerit Odensemi aaqqissuunneqarput, tassunga klubbit 20-t sinnerlugit peqataapput. Nuuk Shotokan Karate-do klubbini ajugaanerpaat arfineq-pingajuattut inissippoq, unammiartortullu qulingiluanit 35-t tikillugit ukioqarput. Shotokan Karate-do Danmarkimi pissartanngorniunnermi aappassaanik peqataatitaqarpoq.
Nuummi apisimasumit Odensemi apisimasumut
Unammiartoqataasut arlallit aatsaat siullerpaamik angajoqqaatit peqatiginagit Danmarkimut angalapput, taamaammat Nuummiit sapaatip akunnerata siuliani sisamanngornermi aallaramik aamma pissangasoqarpoq.
Unammiartortut Odensemut tallimanngormat tikimmata nuna apisimammat tamanna angerlarsimasutut misigisimanangajappoq, tusagassiuutinut nalunaarummi allassimavoq.
Karatertartut pissangasut timersortamimmi tallimanngormat unnukkumut aamma piareersaaqataapput, tamannalu aaqqissuussisut arfininngormat tikilluaqqusinerminni qujassuteqarfigaat.
Nuuk Shotokan Karate-do-mi karatertartut unammeriaatsini ”kata”mi aamma ”kumite”-mi unammipput.
Ulloq unammisut tamanut, ikiuuttunut Nuummiillu ilaquttanut sushitortitsinermik naggaserneqarpoq. Tamatumalu kingorna nunatsinnut uteqqillutik.
Nuuk Shotokan Karate-domeersut katillugit arfineq-pingasunik ujaminnapput.
