DMI-miit anorersuarnissaanik ilimasaarutit Facebookikkoortinneqartalissapput

DMI-miit ulorianarsinnaasumik silapilunnissaanik ilimasaarutit ullumimiit toqqaannartumik inuttut attaveqaatitigut takusinnaalissavatit.

DMI-p ulorianarsinnaasumik silapilunnissaanik ilimasaarutit Facebookikkut quppernerminni ’DMI-Kalaallit Nunaat’-ni saqqummiuttalerniarpai, taamaalillutit ulorianarsinnaasumik silapilunnissaa piareersimaffigilluarniassagakku.

Siusinnerusukkut DMI-p Nunatsinni oqartussaasut kalerrittarpai, silalu pillugu paasissutissat nittartakkamikkut saqqummiuttarlugit, maannamiilli kissaatigaat paasissutissat toqqaannartumik ilinnut annguttalissasut.

- Ulorianarsinnaasumik silapilunnissaanik ilimasaarutit ajornannginneroqisumik kalaallinit takuneqarsinnaasunngortinniarpagut. Siusinnerusukkut oqartussaasut kalerrittarpagut, maannali aamma innuttaasut takusinnaalissavaat silapilunnissaa ilimagineqarnersoq, taama oqarpoq Michael Skelbæk, DMI-mi pisortamut tullersortaasoq.

- DMI-mit Kalaallit Nunaanni illoqarfinni nunaqarfinnilu silassamik ilimasaarutit amerlaqisut suliarineqartarnikuupput, kisianni ulorianarsinnaasumik silapilunnissaanik ilimasaarinerit immaqa ersarippallaartarsimanngillat, pisortap tullia oqarpoq.

Immikkut sullissinertut isigineqassaaq

Tamanna maanna allanngortinneqalerpoq. Siunissami anorersuit anorersuarujussuillu ulorianarsinnaaneri, taamaatsillugulu silamiinnerup ajornerpaaffiatigut inuup inuuneranik naleqarsinnaanera ersarissumik kalerriutigineqartassapput.

- Nalunngilarput kalaalerpassuit pinngortitami qanoq pissusilersornissartik nalunngilluaraat, taamaammat manna immikkut sullissinertut isigisariaqarpoq, Michael Skelbæk oqarpoq.

Ullumikkut DMI Tasiilami piterarnissaanik ilimasaarisarpoq, tassalu anorersuaq tassanngaannartumik sermersuarmiit aqqarsaartoq, tamannalu ingerlatiinnarneqassasoq Michael Skelbæk oqaluttuarpoq.

Saniatigut pingaartumik anorersuarnissaanik ilimasaarisassapput, soorlu anoraasuarsuaq, anorersuaq aamma natsimaneq anorersuannguuttartoq kiisalu sermernarnissaa ilimasaarutigisassallugit.

DMI naapertorlugu Kalaallit Nunaanni oqartussaasut ataatsimoorlutik sinerissami sumiiffiit assigiinngitsut aqqanillit ulorianarsinnaasumik silarlussatillugu DMI-p ilimasaaruteqarfigisartagassaatut aaliangiunnikuuaat.

Ilimasaarineq DMI-p Nuummi allaffianit pisarpoq, tassani silasiortut Kalaallit Nunaata silaa ulloq unnuarlu kaajallallugu malinnaavigisarpaat, maannalu timmisartumik angallassiviit, imaatigut angallattut upalungaarsimatitallu ulorianarsinnaasumik silarlussatillugu DMI-miit kalerrinneqartareerput.