Anorersuarnerani qimuttut 14-it Kulusummi toqusut
- Weekendti una qimmit 14-t anorersuup sialussuullu piliaanik annaavagut, Kulusummi nunaqarfimmi aqutsisut siulittaasuat aamma qimussertartut peqatigiiffiata Qamutser 2016-ip siulittaasuat, Niels Ole Uuttuaq KNR-imut oqarpoq.
Kulusumi qimmit ukiuni kingullerni sikugaangat qimusserfinngoraangallu sikumut nuussorneqartartut taassuma paasissutissiissutigaa. Qimmit nunaqarfiup umiarssualiviata avatinnguani 100 meterisut avasitsigisumiittarput.
Arfininngormat silarlulermat qimmillit qimmitik sikumut unnukkut aqqarnup missaani alakkarpaat.
- Kisianni aarlerinartoqanngeriarmat isumaqatigiippugut aqagumut sapaammi aaqqikkiartoqqinniarlugit, Niels Ole Uuttuaq oqarpoq.
Tassami aamma siku suli immassimananilu aputeqangaatsiarpoq. Kisianni qimmillit ilaataa qimmini ullaaakkut alakkaramigit ajorluinnaartumik takusaqarpoq.
- Ajoraluartumik pinngortitap nakuussusaa takuarput, 6 tiimip iluinnaani siku immarujussuarsimavoq. Akunnerillu arfinillit ingerlanerinnaani qimmit 14-it annaavagut.
