Demokraatit danskit inatsisissaat isornartorsiorpaat
Partiip gruppiani siulittaasoq, Michael Rosing taama oqarpoq.
- Danskit pisortat ingerlatsinerat pillugu paasitinneqarsinnaatitaaneq pillugu inatsisitaavat iluarinngilarput. Isumaqarpugut matoqqanerusoq isertuussinerujussuusorlu, taamaalisoqartarneralu nunatsinni pinngitsoortikkusupparput, Michael Rosing oqarpoq.
Folketingip inatsit nutaaq pisortat ingerlatsinerannut paasitinneqarsinnaatitaaneq 2013-imi atulersippaat.
Inatsit Danskit nunatsinni Savalimmiunilu oqartussaasuini taamani atuuttussaatinneqanngilaq, ajornannginnerulersinniarluguli inatsiseqarnermut ministereqarfiup kissaatigaa, inatsit danskit nunatsinni oqartussaasuinut maanna aamma atuutilissasoq.
Inatsip ilaatigut qarasaasianut toqqorteriviit, pisortat pigisaat danskillu suliffeqarfiutaat tamanit paasisimasaqarfigineqarsinnaalersippai.
Aamma atuaruk Danskit inatsisaata nunatsinni atuutilersinnissaa isumakulunnartoqartikkaat
Ministerit suliaannik takunnissinnaatitaannginnermut malittarisassaq pingaartumik isornartorsiorneqangaatsiarpoq, malittarisassammi pappiaqqat ministerikkoortut paasisimasaqarfigineqarnissaata ajornarnerusilerpaa.
Malittarisassarlu taanna Demokraatinit qularineqarnerpaajusoq, Michael Rosingip oqaatigaa.
- Oqartussammi assigiinngitsut allagaatinik takunnissinnaatitaannginnissaat ajornartorsiutaavoq. Tamannalu isumatsialaanngitsoq isumaqarpugut, Michael Rosing oqarpoq.
Rosing: Peqqarniisaarniartoqartarnera utoqqatsissutigigaat
Danskit nunatsinni oqartussaasuisa Danmarkimi pisortat ingerlatsinerat pillugu paasitinneqarsinnaatitaaneq pillugu inatsimmut ilanngunneqarnissaat Naalagaaffiup Sinniisoqarfiata imatorsuaq sunniuteqassangatinngilaa.
Aamma Demokraatit gruppianni siulittaasoq Danmarkimi pisortat ingerlatsinerat pillugu paasitinneqarsinnaatitaaneq pillugu inatsisitaaq atuutilersinneqassappat danskit oqartussaasuisa ingerlatsinerat pillugu paasitinneqarsinnaatitaaneq sutigut killeqalersinnaassanersoq pillugu imaaliinnarluni tikkuagaqarsinnaanngilaq.
Folketingilli danskit oqartussaasuinut malittarisassat suut atuutsissanerannut aalajangernerat ataqqillugu inatsisip danskit nunatsinni oqartussaasuinut atuutsilersinnissaa Demokraatit taperserniaraat, Michael Rosingip oqaatigaa.
