Danskit inatsisaata nunatsinni atuutilersinnissaa isumakulunnartoqartikkaat
Pisortat ingerlatsinerat pillugu paasitinneqarsinnaatitaanermut inatsit Folketingimi 2013-imi akuersissutigineqarpoq.
Taamaakkaluartoq danskit Nunatsinni Savalimmiunilu oqartussaaffiini atuutilersinneqarani, taamaattorli pisortat ingerlatsinerat pillugu inatsit 1985-imeersoq atuutiinnarluni.
Inatsit taanna danskit oqartussaasuinut tamanut atuukkuni pisariinnerussaaq, inatsisinut atuutsitsinermut ministereqarfik KNR-mut taama nalunaarpoq.
Taamaattumik Danmarkip Naalakkersuisut qinnuigivaat inatsit nutaaq pillugu aalajangiiffigissassasut siunnersuummik inatsisartut ukiaanerani ataatsimiineranni saqqummiusseqqullugit.
Siunnersuut Transparancy Greenlandimit nakkutigeqqissaarniarneqarpoq, Anita Hoffer oqarpoq. Inatsit nutaaq Danmarkimi atuutilersinneqarmat, aalassassutigineqarluni isornartorsiorneqangaatsiarpoq,
Pisortat ingerlatsinerat pillugu paasitinneqarsinnaatitaaneq pillugu inatsit akuersissutigineqarmat isornartorsiorneqartupilussuuvoq, pingaartumik Danmarkimi tusagassiorfinnit. Tusagassiortut allallu, allagaatinik ministerinut qanittumik attuumassutilinnik aamma ministerit aqutsisoqarfiillu akornanni allagaatinik paasitinneqarsinnaatitaanerannut malittarisassat sukateriffigineqarnerat ilaatigut tamatumunnga pissutaavoq.
- Allagaatinik piniarnermi tusagassiortunut ajornarnerulissappat tamanna ajortumik kinguneqassaaq. Anita Hoffer KNR-imut oqarpoq.
