Demokraatineersup Anna Wangenheimip angutit Kalaallit Nunaanni inatsisitigut naartuersitsinissaminnut pisinnaatitaaffeqalernissaannut periarfissat oqallisigiumavai.Assi: Malik Brøns / KNR

Demokraatit peqqinnissamut oqaaseqartartuat: Angutit inatsisitigut naartuerseqqusinissamut periarfissaqassapput

Anna Wangenheim Demokraatineersoq siunnersuivoq angutit meeraq meerariumanagu aalajangersinnaanerat inatsisitigut periarfissinneqassasoq. Suliniuteqarnerup Kalallit Nunaanni kinguaassiuutitigut peqqinnanngitsumik pissuseqarneq pinngitsoortissinnaassavaa, oqarpoq.

Kalaallit Nunaanni angutinut inatsisitigut naartuersitseqqusinissaq eqqunneqartariaqarpa?  

Qaammatip tulliani apeqqut taanna Inatsisartuni upernaakkut ataatsimiinnermi sammineqassaaq. Inatsisitigut naartuersitseqqusinissamut pisinnaatitaanermik siunnersuut Demokraatit peqqinnissamut oqaaseqartartuannit  Anna Wangenheimimit saqqummiunneqarpoq.

Inatsisitigut naartuersitseqqusinerup kinguneraa ataataasup meeraq pappiaqqatigut meerariumanagu atsiorsinnaanera, taamalu anaanaasumut meeqqamut akilersuissanani. Ilutigalugu meeraq kia ataataanerata paasinissaanut mattunneqassaaq.

Inatsisitigut naartuersitsiseqqusinissamut pisinnaatitaaffik arlaleriarluni ilaatigut Danmarkimi oqallisigineqartarpoq, kisianni nunarsuarmi nunat arlaannaanniluuniit eqqunneqanngilaq. Siunnersuutikkut Anna Wangenheimip angutit naartuersinnermut aamma naartunermut atatillugu pisinnaatitaaffiisa siuarsarnissaat anguniarpaa.   

Tassani isumaqarpoq inatsisitigut naartuersitseqqusinerup nunatsinni kinguaassiuutitigut peqqinnanngitsumik pissuseqarneq pinngitsoortissinnaassagaa. 

- Ileqqorissaarnikkut pisariusumik katitikkat tassani amerlapput. Kisianni oqallisigisinnaanissaa pingartuuvoq politikeritut nunami maani avinnerpassuarnut, meeqqat taama amerlatigisut angerlarsimaffimmik avataanni inissinneqartarnerannut aamma suli amerlaqisunik kissaatigisaanngitsumik naartusoqartarnermut nipaatsumik isiginnaartuuginnarsinnaannginnatta. Inuiaqatigiinni suli kinguaassiuutitigut taama peqqinnanngitsigisumik pissuseqartoqarpoq allaat inuiaqatigiit sannaannik sunniisumik, oqarpoq. 

AAMMA ATUARUK Tupaarna Egede: Vejle Kommunip naartuersinnissamut kimigiiserfigaanga

Kinguaassiuutitigut peqqinnanngitsumik pissusilersorneq Anna Wangenheimip oqaliisigitinniagaa ilaatigut peqquteqarpoq naartuersittarnerup Kalaallit Nunaanni annertuallaarneranik. Taamaattumik neriuutigaa inatsisitigut naartuersitseqqusinissamut periarfissap nassatarissagaa inuit amerlanerit atoqateqartinnatik illersuuteqarnissaq eqqarsaatigisalissagaat.  

- Amerlanerit oqaloqatigiitalerpata illersuuteqarnata atoqatigiikkutta naartusoqalersinnaaneranik pinngitsoortitsisissutaasinnaavoq, oqarpoq.

Meeraq kisermaallugu 

Inatsisitigut naartuersitseqqusisarnermut siusinnerusukkut oqallinnerni akerliunermut tunngavilersuutigineqartarpoq arnaq meeqqamik kisermaassisinnaalersarmat.    

Kisianni tamanna atugaavoq, inatsisitigulluuniit naartuersitsinngikkaluaraanni, Anna Wangenheim oqarpoq:

- Susoqaraluarpalluuniit pissutsimut taamaattumut pisoqariaannavoq, assersuutigalugu aamma avinnermi. Katissimagaanni meerartaarlunilu takorloorneqartarpoq meeraq perorsarniarlugu marluusariaqarluni, kisianni taamaakkaluartoq alianartunik pisoqarsinnaasarpoq meeqqami perorsarnissaanut akisussaaffimmik tigusisariaqarluni.  

Angutit inatsisitigut naartuersitsinissamut pisinnaatitaaffeqarnissaannik apeqqut takkuppoq Kalaallit Nunaanni inatsisitigut ataataqanngitsut arlallit danskit inatsisitigut assigiinngitsitsineq pissutigalugu naalagaaffiannit utoqqatserfigineqarnissamik taarsiiffigineqarnissamillu piumasaqarmata, taamaaliornikkut taamani ataatamik kinaaneranik paasitinneqarsinnatitaajunnaaramik aqqanik ateqarsinnaajunnaarlutik kingornussisisinnaajunnaarlutillu.      

Inatsisitigut ataataqanngitsut misilittagaasa ilinniarfigineqassanerannik aperineqarami Anna Wangenheim akivoq:

- Isumaqarpunga assersuuneqarsinnanngitsut, oqaluttuarisaanermi allarujussuarmut atasuummata. Ullumikkut meeqqiortoqarsinnaavoq angajoqqajusut tamaasa ilisimatitsissutiginngikkaluarlugu, ilaatigut tamanna atuuppoq meeqqanut anisuuersitat meeraannut.   

Anna Wangenheimip siunniuppaa inatsisitigut naartuersitsinissami sapaatip akunneri 12-iat killiliussaassasoq, soorlu aamma timikkut naartuersinnermut atuuttoq.  



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl