Tupaarna Egede: Vejle Kommunip naartuersinnissamut kimigiiserfigaanga
- Naartuersinnissara isumaliuutiginngisaarnarnikuuara. Pisortat naartuersinnissannut kimigiiserput. Taamaalinngikkuma arsaarinnissapput. Naalungiaq malugisinnaalereerlugu naartuersikkuma imminut isumakkeerfigisinnaanavianngilanga.
Tupaarna Egede Danmarks Radiomut oqarpoq.
Vejle Kommunemi sulisut Tupaarna Egedep naartuersinnissaanut kimigiisernerat sms-ikkut immiussakkullu uppernarsarneqareersorli sammisaq taanna ukkatarineqangaatsialerpoq.
Nammineq assiutisaq: Tupaarna Egede.
Kommunimi ilaqutariinnut innarluutilinnullu immikkoortortaqarfiup aqutsisuata oqaloqatiginerata Tupaarna Egede toqqaannarluinnartumik qinigassinneqarpoq.
- Naartuersinnissamut maannakkut inniminniinissat sakkortuumik inassutigaara, taamaanngippat ernisarfimmi arsaarinninnissarput qularnanngilaq, tamannalu arlaannut iluaqutaanavianngilaq.
Ilisimatuut: Killissamik qaangeerujussuarpoq
Ilisimatuut arlallit DR-ip oqaloqatigisaasa oqarnerat naapertorlugit kommuni Tupaarna Egedep naartuersinnissamik toqqaanissaanik kimigiiseqqusaanngilaq.
Allaat Københavns Universitetimi isumaginninnermi inatsisit pillugit professorip, Kirsten Ketscherip kommune killissamik qaangiivallaarsoraa.
- Arnammi kissaateqarneratigut naartuersittoqartassasoq inatsimmi ersarilluinnarpoq. Inunnut kimigiiserluni meeraq arsaarinnissutaassasoq siorasaarutigineqartussaanngilaq. Tamanna killissamik qaangiineruvoq, professori DR-imut oqarpoq.
Aarhus Universitetiani inatsisit pillugit lektori, Caroline Adolphsen aamma taama isumaqarpoq.
- Naartuersinneq peqqissutsimut tunngasumik suliaqarneruvoq, tamanna arnap pisinnaatitaaffigaa, naartuersinnissamullu pisussaaffeqanngisaannarluni. Tamanna kommunimit siunnersuutigineqaqqusaananilu siunnersuutigineqarsinnaanngilaq, Caroline Adolphsen oqarpoq.
Kommunip sms-ikkut ajusaarutigai, naartuersinnissamulli innersuussinerit ajuusaarutiginagit
Vejle Kommunimi ilaqutariinnut pinaveersaartitsinermullu pisortap, Anette Ravn Olsenip kommunip Tupaarna Egedellu akornanni attaveqaqatigiinnerup naammaginannginnera ajuusaarutigalugu KNR-imut oqaatigaa.
Kommunilli naartuersinnissaanut siunnersuinera kukkusuusorinngilaa.
- Naartuersinneq pillugu oqaloqateqarsimagaangatta innuttaasut siunnersornissaannut ilitsersornissaannullu pisussaaffeqarnerput pissutaasarpoq. Ilisimasagulli aallaavigalugit qaqutigut naliliisarpugut, ilaqutariit ajornartorsiutaat qaammatini arfinilinni aqqaneq-marlunniluunniit aaqqiivigineqarsinnaanngitsut, Anette Ravn Olsen oqarpoq.
Tupaarna Egedep pania aqqanilinnik ukiulik Vejle Kommunemit qanittukkut arsaarinnissutaavoq. Meeqqap ineriartornerani atugaanilu aarlerinartoqartoq tassani nalilerneqarpoq.
Sumiuunermut tunngassuteqanngitsoq
Inunnik danskisut tunuliaqutaqanngitsunik attaveqarnermi immikkut ittumik kommunitut maluniaasoqarnissaa pingaaruteqartoq, Aarhus Universitetianit Caroline Adolphsen DR-imut oqarpoq.
- Kalaallisut tunuliaqutaqartut allatut attaveqaqateqartariaaseqarnerat pissutigalugu pissutsinut paasisinnaangisaminnut inissinneqartunik takusaqarnikuuvunga. Tupaarna Egedep amigassamik atornerluinerarneqarnini ilisarisinnaanngikkuniuk taava kalaalinut isiginnittariaatsimut kukkulluinnartumut tamanna atassuteqarnersoq isumaliutigineqarsinnaavoq.
Vejle Kommunilli Tupaarna Egedep kalaalliunera suliamik isumaginninnermut attuumassuteqannginnerarpaa.
- Innuttaasunik allamiunik ukkatarinnilluartarpugut. Kisianni meeqqat angajoqqaaminni najugaqarsinnaanersut pineqaraangat kulturi pineqarneq ajorpoq. Taamaattoqaraangat meeqqat pisariaqartitaat angajoqqaaniit isumagineqarsinnaanersut pineqartarput, Anette Ravn Olsen oqarpoq.
Taamaammat kalaaliunera apeqqutaasimannginnerarpat?
- Sunniuteqanngilluinnarpoq, Vejle Kommuneaneersoq Anette Ravn Olsen oqarpoq.
Tupaarna Egedep paniata aqqanilinnik ukiullip angerlarsimaffiup avataanut inissinneqarnissaanut Tupaarna Egedep aningaasaqarnerliornera, najugaqannginnera atornerluisutullu pasineqarnera pissutaasut kommunip aalajangiinerani allassimavoq.
Tupaarna Egedelli taamaattoqannginnerarpaa.
