Demokraatit Kommune Kujallermi siaruartut – unammillertinit nuuttut

Karen Marie Kyed Frederiksen aamma Simon Simonsen Kommune Kujallermi Demokraatini ilaasortanngorput.

Taakku Siumumit februaarip naanerani tunuareerlutillu Demokraatinut ilaasortanngorput. Demokraatit tusagassiuutinut nalunaarummi allapput.

Qinikkat marluk Siumup politikkiani imminut takusinnaajunnaarsimallutik tunngavilersuutigaat:

- Ilutigisaanillu ersarilluinnarsimavoq nuna tamakkerlugu aammalu maani kommunitsinni isummat Demokraatiniit saqqummiunneqartartut isumaqatigalugit. Tamanna tunngavigalugu Demokraatit tunuliaqutarissallugit aaliangersimavunga, Karen Marie Kyed Frederiksen oqarpoq.

Kisimiinngitsoq

Taassuma piffissami tassani Siumumit aamma tunuartoq Simon Simonsen ilaasortanngoqatigaa, taassumalu tamanna sumik tunngaveqarnersoq isertuutinngilaa. Taassumammi Siumut IA-p politikkianik aqutaasoraa.

- Siunnerfeqanngippallaarneq pilersaaruteqannginnerlu peqqutigalugit Kommune Kujallermi nunalu tamakkerlugu ineriartorneq kigaappallaalersoraara. Nunamilu maani asaqisanni siunissarput pillugu Demokraatit ersarinnerpaanik pitsaanerpaanillu isummersortut isigaakka, Simon Simonsen oqarpoq.

Qinikkat marluk Siumumit aninertik oqitsuinnaanngitsoq KNR-imut oqaatiginikuuaat, Siumumili takorluukkat amigaataanerat pissutigalugu partiimi imminnut takusinnaajunnaarsimallutik oqaatigaat, tassanilu aalisarneq pillugu inatsit oqallisaangaatsiartoq assersuutigaat:

- Piffissami kingullermi aamma uanga isertuutinngivillugu oqaatigisaqattaarpara aalisarnermut inatsisissap uuma maanna siunnersuutigineqartup taama isikkoqarluni akuerineqarnissaa peqataaffigisinnaanagu, Simon Simonsen februaarimi Siumumit tunuarnermini oqarpoq.

Siuariangaatsiartut

Demokraatit Kommune Kujallermi marlunnik nutaanik ilaasortaqalernermi pingasunik Kommune Kujallermi kommunalbestyrelsiniititaqalerput.

Demokraatit Kommune Kujallermi nutaanik marlunnik ilaasortaatitaqalernerminni Kommune Kujallermi kommunalbestyrelsimi pingasunik ilaasortaatitaqalerput. Margrethe Thårup Andersen Kommune Kujallermi kommunalbestyrelsimi aamma ilaasortaasoq Siumumit siorna aamma tunuarpoq Demokraatinullu nuulluni.

Partiimilu siuariartortoqarnera siulittaasup, Jens-Frederik Nielsenip nuannaarutigaa.

Taassuma partiip nuna tamakkerlugu siuariartornera erseqqissaatigaa, 'nuiumasullu' Demokraatit politikkiannik sulissutiginnikkusuttuunerarlugit.

Ilaasortat nutaat marluk nunatsinni meeqqanik ukkataqarnerminnik ingerlatitsiinnassapput.

- Meeqqat siunissaraagut, pitsaasunillu ulluunerani paaqqinnittarfiit, meeqqat atuarfii aammalu sunngiffimmi susassaqartitsinermi atugassarititat sinaakkuteqarnissaat qulakkiissallugu qinikkatut akisussaaffigaarput. Kommunerisatsinni meeqqat atugassarititaat sallersaatinneqarnissaat pingaarnersiorneqassasut pingaartipparput, Simon Simonsen oqarpoq.